പുതിയ ഫോൺ മോഡലുകൾ അവതരിപ്പിച്ച് ജിയോഭാരത്

‌
ന്യൂഡൽഹി: റിലയൻസ് ജിയോ പുതിയ രണ്ട് ഫോർജി ഫീച്ചർ ഫോണുകൾ പുറത്തിറക്കി. ജിയോ ഭാരത് സീരിസിൽ വി3, വി4 ഫോണുകളാണ് ഇന്ത്യ മൊബൈൽ കോൺഗ്രസ് വേദിയിൽ അവതരിപ്പിച്ചത്.

1,099 രൂപ മാത്രം വിലയുള്ള പുതിയ മോഡലുകൾ മാസം 123 രൂപ മുതൽ ആരംഭിക്കുന്ന പ്ലാൻ ഉപയോഗിച്ച് റീച്ചാർജ് ചെയ്യാം. അൺലിമിറ്റഡ് വോയ്‌സ് കോളുകളും 14 ജിബി ഇന്റർനെറ്റ് ഡേറ്റയുമാണ് ഈ പ്ലാൻ ഓഫർ ചെയ്യുന്നത്. ആയിരം എംഎഎച്ച് ബാറ്ററിയിൽ വരുന്ന ഫോണിൽ 128 ജിബി വരെ സ്റ്റോർ ചെയ്യാം. പുതിയ ഡിസൈനിൽ വരുന്ന ഫോൺ 23 ഇന്ത്യൻ ഭാഷകൾ പിന്തുണയ്ക്കും.

ജിയോ ടിവി, ജിയോ സിനിമ, ജിയോ പേ, ജിയോ ചാറ്റ് തുടങ്ങിയ ആപ്പുകളും ഇതിൽ ലഭ്യമാണ്. 455 ലൈവ് ടിവി ചാനലുകളിലൂടെ സിനിമകളും വീഡിയോകളും സ്‌പോർട്‌സ് പരിപാടികളും ആസ്വദിക്കാം. യുപിഐയുമായി ബന്ധിപ്പിച്ചിരിക്കുന്ന ജിയോ പേ ഫീച്ചർ ഉപയോഗിച്ച് എളുപ്പത്തിൽ ഡിജിറ്റൽ ഇടപാടുകൾ നടത്താനും സാധിക്കും. ഉടൻ തന്നെ ഫോണുകൾ വിപണിയിൽ ലഭ്യമാകും. ജിയോ മാർട്ട്, ആമസോൺ എന്നിവ വഴി ഓൺലൈൻ വഴി വാങ്ങാനുള്ള സൗകര്യവും ഒരുക്കും.