പിന്നെയും നാണക്കേട്; അയര്‍ലന്‍ഡിനോട് തോറ്റ് ദക്ഷിണാഫ്രിക്ക

അബുദാബി : രണ്ടാമത്തെ മത്സരത്തില്‍ അയര്‍ലന്‍ഡിനോട് തോറ്റ് ദക്ഷിണാഫ്രിക്ക. അഫ്ഗാനിസ്ഥാനോട് ഏകദിന പരമ്പര തോറ്റതിന്റെ നാണക്കേട് മാറുംം മുമ്പെയാണ് ടി20 പരമ്പരയിലെ അടുത്ത തോല്‍വി. ലോകകപ്പ് ഫൈനലില്‍ കളിച്ച ദക്ഷിണാഫ്രിക്കയെ 10 റണ്‍സിന് തോല്‍പ്പിച്ച അയര്‍ലന്‍ഡ് രണ്ട് മത്സര പരമ്പര സമനിലയാക്കി(11).  ആദ്യ മത്സരത്തില്‍ ദക്ഷിണാഫ്രിക്ക 8 വിക്കറ്റിന് ജയിച്ചിരുന്നു. 

ടി20 ചരിത്രത്തില്‍ ദക്ഷിണാഫ്രിക്കക്കെതിരെ അയര്‍ലന്‍ഡിന്റെ ആദ്യ ജയമാണിത്. കഴിഞ്ഞ ദിവസം അബുദാബിയില്‍ നടന്ന രണ്ടാം മത്സരത്തില്‍ ആദ്യം ബാറ്റ് ചെയ്ത അയര്‍ലന്‍ഡ് ഓപ്പണര്‍ റോസ് അഡയറുടെ സെഞ്ചുറി കരുത്തില്‍ 20 ഓവറില്‍ ആറ് വിക്കറ്റ് നഷ്ടത്തില്‍ 195 റണ്‍സെടുത്തപ്പോള്‍ ദക്ഷിണാഫ്രിക്കക്ക് 20 ഓവറില്‍ ഒമ്പത് വിക്കറ്റ് നഷ്ടത്തില്‍ 185 റണ്‍സെടുക്കാനെ കഴിഞ്ഞുള്ളു.

ആദ്യം ബാറ്റ് ചെയ്ത അയര്‍ലന്‍ഡിനായി ഓപ്പണര്‍മാരായ ക്യാപ്റ്റന്‍ പോള്‍ സ്റ്റെര്‍ലിങും(31 പന്തില്‍ 52) റോസ് അഡയറും ചേര്‍ന്ന്(58 പന്തില്‍ 100) ഓപ്പണിംഗ് വിക്കറ്റില്‍ 13 ഓവറില്‍ 137 റണ്‍സെടുത്തപ്പോള്‍ പിന്നീട് 20 റണ്‍സെടുത്ത ഡോക്റെല്‍ മാത്രമാണ് രണ്ടക്കം കടന്നത്. അഡയര്‍ 58 പന്തില്‍ അഞ്ച് ഫോറും ഒമ്പത് സിക്‌സും പറത്തിയാണ് സെഞ്ചുറിയിലെത്തിയത്. സ്റ്റിര്‍ലിങ് 31 പന്തില്‍ 52 റണ്‍സെടുത്തു. ഇരുവരും പുറത്തായശേഷം 13 പന്തില്‍ 20 റണ്‍സെടുത്ത ഡോക്റെല്‍ മാത്രമെ തിളങ്ങിയുള്ളൂ എങ്കിലും അയര്‍ലന്‍ഡ് ആറ് വിക്കറ്റ് നഷ്ടത്തില്‍ 195 റണ്‍സിലെത്തി.