ദക്ഷിണാഫ്രിക്ക-ബംഗ്ലാദേശ് ടെസ്റ്റ്: മിര്‍പൂരില്‍ വിക്കറ്റ് പെയ്ത്ത്

ദക്ഷിണാഫ്രിക്കയും ബംഗ്ലാദേശും തമ്മിലുള്ള ഒന്നാം ടെസ്റ്റിന്റെ ആദ്യ ദിവസം വീണത് 16 വിക്കറ്റുകള്‍. മത്സരത്തില്‍ ടോസ് നേടി ആദ്യം ബാറ്റ് ചെയ്ത ബംഗ്ലാദേശ് ഒന്നാം ഇന്നിംഗ്‌സില്‍ 106 റണ്‍സില്‍ എല്ലാവരും പുറത്തായി. പിന്നാലെ ഒന്നാം ഇന്നിംഗ്‌സ് ബാറ്റിങ്ങിനിറങ്ങിയ ദക്ഷിണാഫ്രിക്ക ആദ്യ ദിനം മത്സരം നിര്‍ത്തുമ്പോള്‍ ആറ് വിക്കറ്റ് നഷ്ടത്തില്‍ 140 റണ്‍സെന്ന നിലയിലാണ്. 34 റണ്‍സിന്റെ ഒന്നാം ഇന്നിംഗ്‌സ് ലീഡാണ് ദക്ഷിണാഫ്രിക്ക ഒന്നാം ഇന്നിംഗ്‌സില്‍ ഇതുവരെ നേടിയത്.
നേരത്തെ മഹ്മൂദുല്‍ ഹസന്‍ ജോയ് നടത്തിയ ചെറുത്ത് നില്‍പ്പാണ് ബംഗ്ലാദേശ് സ്‌കോര്‍ 100 കടത്തിയത്. 97 പന്തില്‍ രണ്ട് ഫോറും ഒരു സിക്‌സും ഉള്‍പ്പടെ മഹ്മൂദുല്‍ 30 റണ്‍സെടുത്തു. നാല് താരങ്ങള്‍ക്ക് മാത്രമാണ് ബംഗ്ലാദേശ് നിരയില്‍ രണ്ടക്കം കടക്കാനായത്. മുഷ്ഫീഖര്‍ റഹീം 11 റണ്‍സ്, മെഹിദി ഹസ്സന്‍ മിറാസ് 13 റണ്‍സ്, തൈജൂള്‍ ഇസ്ലാം 16 റണ്‍സ് എന്നിങ്ങനെയും സ്‌കോര്‍ ചെയ്തു.
ദക്ഷിണാഫ്രിക്കയ്ക്കായി കഗീസോ റബാഡ, വയാന്‍ മള്‍ഡര്‍, കേശവ് മഹാരാജ് എന്നിവര്‍ മൂന്ന് വീതം വിക്കറ്റുകളെടുത്തു. ആദ്യ ഇന്നിംഗ്‌സില്‍ ബാറ്റിങ്ങിനിറങ്ങിയ ദക്ഷിണാഫ്രിക്കയും കടുത്ത ബാറ്റിങ് തകര്‍ച്ചയാണ് നേരിടുന്നത്. ടോണി ഡി സോര്‍സി 30 റണ്‍സ്, ട്രിസ്റ്റണ്‍ സ്റ്റബ്‌സ് 23 റണ്‍സ്, റയാന്‍ റിക്ലത്തോണ്‍ 27 റണ്‍സ് എന്നിങ്ങനെയാണ് ദക്ഷിണാഫ്രിക്കന്‍ നിരയിലെ പ്രധാന സ്‌കോറുകള്‍. ബംഗ്ലാദേശിനായി തൈജുള്‍ ഇസ്ലാം അഞ്ച് വിക്കറ്റ് വീഴ്ത്തി.