സഞ്ജു, ഞാന്‍ കാണാന്‍ ഇഷ്ടപ്പെടുന്ന താരം: പ്രശംസിച്ച് റിക്കി പോണ്ടിംഗ്

മലയാളി ക്രിക്കറ്റര്‍ സഞ്ജു സാംസണെ പുകഴ്ത്തി മുന്‍ ഓസ്‌ട്രേലിയന്‍ ക്യാപ്റ്റനും കമന്റേറ്ററുമായ റിക്കി പോണ്ടിംഗ്. സ്‌കൈ സ്‌പോര്‍ട്‌സിന് വേണ്ടി മുന്‍ ഇംഗ്ലണ്ട് ക്യാപ്റ്റന്‍ നാസര്‍ ഹുസൈനോടൊപ്പം നടത്തിയ സംഭാഷണത്തിലാണ് പോണ്ടിംഗ്, ഇന്ത്യന്‍ ടി20 വിക്കറ്റ് കീപ്പറെ കുറിച്ച് സംസാരിച്ചത്. ഇരുവര്‍ക്കും പ്രിയപ്പെട്ട വേദി, ഇഷ്ടപ്പെട്ട താരങ്ങള്‍, ഏറ്റവും മികച്ച താരങ്ങള്‍, സ്ലെഡ്ജിംഗ് നിമിഷങ്ങള്‍, വെല്ലുവിളി നേരിട്ട നിമിഷങ്ങള്‍ എന്നിവയെ കുറിച്ചെല്ലാം സംസാരിക്കുമ്പോഴാണ് സഞ്ജുവിന്റെ പേരും ചര്‍ച്ചയിലേക്ക് വന്നത്.
ഏത് താരങ്ങളുടെ ശൈലിയാണ് ഇഷ്ടമെന്നുള്ള ചോദ്യത്തിന് രോഹിത് ശര്‍മ, ശുഭ്മാന്‍ ഗില്‍, ഋഷഭ് പന്ത്, വിരാട് കോഹ്്‌ലി തുടങ്ങിയ ഇന്ത്യന്‍ താരങ്ങളെ പ്രകടനം ആസ്വദിക്കാറുണ്ടെന്ന് പോണ്ടിംഗ് പറഞ്ഞു. ഇതിനൊപ്പമാണ് രാജസ്ഥാന്‍ റോയല്‍സ് നായകന്‍ സഞ്ജു സാംസണോടുള്ള ആരാധനയും അദ്ദേഹം പ്രകടമാക്കിയത്.
സഞ്ജുവിന്റെ ബാറ്റിംഗ് ശൈലിയെയും ടി20യിലെ കളിയോടുള്ള സമീപനത്തെയും പ്രശംസിച്ചു. പോണ്ടിംഗിന്റെ വാക്കുകള്‍ ഇങ്ങനെ: ''ഇന്ത്യന്‍ ബാറ്റിംഗ് നിരയിലേക്ക് നോക്കൂ. രോഹിത്  എത്രത്തോളം മനോഹരമായിട്ടാണ് കളിക്കുന്നത്. ശുഭ്മാന്‍ ഗില്‍ കളിക്കുന്നത് കാണാന്‍ ഇഷ്ടപ്പെടുന്നു. റിഷഭ് പന്തിന്റെ ബാറ്റിംഗ് ഞാന്‍ ആസ്വദിക്കാറുണ്ട്. അതിനിടയില്‍ കോഹ്്‌ലി. ടി20 ക്രിക്കറ്റില്‍ സഞ്ജു സാംസണ്‍ എന്ന വ്യക്തിയെ നിങ്ങള്‍ എത്രമാത്രം കണ്ടിട്ടുണ്ടെന്ന് എനിക്കറിയില്ല. ടി20യില്‍ സഞ്ജു ക്രീസിലെത്തുന്നത് മുതല്‍ ബാറ്റ് ചെയ്യുന്നതും ഞാന്‍ ഏറെ ഇഷ്ടപ്പെടുന്നു.'' പോണ്ടിംഗ് പറഞ്ഞു.