കാത്തിരിപ്പിനൊടുവില് സഞ്ജു സാംസണ് ഇന്ത്യന് ലോകകപ്പ് ടീമില് എത്തിയതില് സന്തോഷം പങ്കുവെച്ച് പിതാവ് സാംസണ് വിശ്വനാഥ്. തന്റെ മകന് ഇന്ത്യന് ലോകകപ്പ് ടീമില് എത്തുന്ന നിമിഷത്തിനായി താന് ഏറെക്കാലമായി കാത്തിരിക്കുന്നതാണ് എന്നും ഇത് വലിയ സന്തോഷം നല്കുന്ന നിമിഷമാണെന്നും സാംസണ് വിശ്വനാഥ് പറഞ്ഞു.
'2013 മുതല് ഞാന് ഈ നിമിഷത്തിനായി കാത്തിരിക്കുകയാണ്, ഇപ്പോള് സഞ്ജു 15 അംഗ ഇന്ത്യന് ടീമില് ഇടം നേടി ആദ്യ കടമ്പ കടന്നു. അടുത്ത ഘട്ടം പ്ലെയിംഗ് ഇലവനിലേക്ക് കടക്കുക എന്നതാണ്, അതിനുശേഷം അവന്റെ ബാറ്റില് നിന്ന് റണ്സ് ഒഴുകണം. ഇത് സംഭവിക്കുമ്പോള്, ഞാന് ശരിക്കും സന്തോഷിക്കും, ''സഞ്ജുവിന്റെ അച്ഛന് സാംസണ് വിശ്വനാഥ് പറഞ്ഞു.
''എന്റെ രണ്ട് മക്കളും ക്രിക്കറ്റ് കളിക്കുന്നുവെന്ന് ഉറപ്പാക്കാന് ഞാന് ജോലി ഉപേക്ഷിച്ചു. ഈ നിമിഷത്തിനായി ഞാന് വളരെക്കാലമായി കാത്തിരിക്കുകയാണ്. സഞ്ജു എപ്പോഴും ടീമിന് വേണ്ടിയാണ് കളിക്കുന്നത്, തനിക്കുവേണ്ടിയല്ല,' വിശ്വനാഥ് പറഞ്ഞു.
''അവന് ഓരോ പന്തും പരമാവധി അടിക്കാനാണ് മുമ്പ് ശ്രമിച്ചത്... എന്നാല് ഈ സീസണില് നമ്മള് കാണുന്നത് വ്യത്യസ്തനായ സഞ്ജുവിനെയാണ്. രാജ്യത്തിന് വേണ്ടി അദ്ദേഹം റണ്സ് സ്കോര് ചെയ്യുന്നത് കാണാന് കാത്തിരിക്കുകയാണ് ഇപ്പോള്,' വിശ്വനാഥ് അഭിപ്രായപ്പെട്ടു.
സാംസണ് വിശ്വനാഥ് മുമ്പ് സന്തോഷ് ട്രോഫിയില് ഡല്ഹി ഫുട്ബോള് ടീമിനെ പ്രതിനിധീകരിച്ചിട്ടുള്ള താരമാണ്. തന്റെ രണ്ട് മക്കളുടെ ക്രിക്കറ്റ് കരിയര് പടുത്തുയര്ത്താന് ആയി ജോലി ഉപേക്ഷിച്ചാണ് സാംസണ് വിശ്വനാഥ് തിരുവനന്തപുരത്തേക്ക് തിരികെയെത്തിയത്.