‘ ഇത് നിങ്ങളുടെ ലോകകപ്പാണ്, ടി 20 കിരീടം നേടാൻ രോഹിത് അർഹൻ'; ടീം ഇന്ത്യയ്ക്ക് പിന്തുണയുമായി മുൻ പാക് താരം

കരുത്തരായ ഓസ്‌ട്രേലിയയെ വീഴ്‌ത്തി ടി20 ലോകകപ്പ് സെമി ഫൈനലിൽ ഇടംനേടിയിരിക്കുകയാണ് ടീം ഇന്ത്യ.ഏകദിന ലോകകപ്പ് ഫൈനലിൽ ഓസ്‌ട്രേലിയയോട് വഴങ്ങിയ തോൽവിയ്‌ക്കുള്ള മധുര പ്രതികാരം കൂടിയായിരുന്നു രോഹിത്തിന്റെയും സംഘത്തിന്റെയും ഈ ജയം.

നിരവധി പേരാണ് ഇന്ത്യയ്ക്ക് അഭിനന്ദങ്ങളുമായെത്തിയത്. ഇപ്പോഴിതാ  ടീം ഇന്ത്യയെ അഭിനന്ദിച്ച് രം​ഗത്തെത്തിയിരിക്കുകയാണ് മുൻ പാകിസ്താൻ മുൻ താരം ഷൊയ്ബ് അക്തർ. ഇന്ത്യയുടെ ലോകകപ്പാണിതെന്നാണ് ഷൊയ്ബ് പറയുന്നത്. ഓസ്‌ട്രേലിയയെ വീഴ്‌ത്തി ടീം ഇന്ത്യ ടി20 ലോകകപ്പിന്റെ സെമി ഫൈനലിൽ പ്രവേശിച്ചതിന് പിന്നാലെയാണ് ഷൊയ്ബ് അക്തറിന്റെ പ്രതികരണം.

‘വെൽ ഡൺ ഇന്ത്യ, ഇത് നിങ്ങളുടെ ലോകകപ്പാണ്. ഈ ടി20 ലോകകപ്പ് നിങ്ങൾ തന്നെ നേടണം.അതോടെ ഇന്ത്യൻ ഉപഭൂഖണ്ഡത്തിൽ ലോകകിരീടമെത്തും. മുമ്പ് നിങ്ങൾ ലോകജേതാക്കളായിട്ടുണ്ടെങ്കിലും ഈ ലോകകപ്പിന്റെ അവകാശികൾ നിങ്ങളാണ്. 100 ശതമാനവും നിങ്ങളതിന് യോഗ്യരാണ്. ഞാൻ നിങ്ങളെ പൂർണ്ണമായും പിന്തുണയ്‌ക്കുന്നു. ഓസീസിനെതിരെ രോഹിത് ശർമ്മയുടെ ഉദ്ദേശ്യം മികച്ചതായിരുന്നു. ടി20 കിരീടം നേടാൻ രോഹിത് ശർമ്മ അർഹനാണ്”. അക്തർ തന്റെ യൂട്യൂബ് ചാനലിൽ പറഞ്ഞു.

2023-ലെ ഏകദിന ലോകകപ്പിൽ ജയിക്കേണ്ട ടീമായിരുന്നു ടീം ഇന്ത്യ. ഓസ്‌ട്രേലിയയോട് തോറ്റതോടെ ഇന്ത്യൻ ടീം മാനസികമായി തകർന്നിരുന്നു. അതുകൊണ്ടു തന്നെ ഓസീസിന് മറുപടി നൽകാൻ ടീം ഇന്ത്യ ആഗ്രഹിച്ചിട്ടുണ്ടാകണമെന്നും അക്തർ കൂട്ടിച്ചേർത്തു. 24 റൺസിനായിരുന്നു ഇന്ത്യയുടെ ജയം.