രഞ്ജി ട്രോഫി: കേരളം ഭേദപ്പെട്ട നിലയില്‍; അന്‍ഷുലിന് എട്ടു വിക്കറ്റ്

രഞ്ജി ട്രോഫി ക്രിക്കറ്റില്‍ ഹരിയാനക്കെതിരേ കേരളം ബാറ്റിംഗ് തകര്‍ച്ചയില്‍നിന്ന് കരകയറി. ഇന്ന് കളി നിര്‍ത്തുമ്പോള്‍ കേരളം എട്ടു വിക്കറ്റ് നഷ്ടത്തില്‍ 285 റണ്‍സ് എന്ന നിലയിലാണ്. രണ്ട് വിക്കറ്റ് നഷ്ടത്തില്‍ 138 റണ്‍സെന്ന നിലയില്‍ രണ്ടാംദിനം ക്രീസിലിറങ്ങിയ കേരളം 158-5ലേക്ക് വീണെങ്കിലും ഏഴാമനായി ക്രീസിലെത്തിയ വിക്കറ്റ് കീപ്പര്‍ ബാറ്റര്‍ മുഹമ്മദ് അസറുദ്ദീന്റെയും ക്യാപ്റ്റന്‍ സച്ചിന്‍ ബേബിയുടെയും അര്‍ധസെഞ്ചുറികളുടെ മികവില്‍ കരകയറുകയായിരുന്നു. എന്നാല്‍ അര്‍ധസെഞ്ചുറി പൂര്‍ത്തിയാക്കിയ ഉടന്‍ ഇരുവരും പുറത്തായത് കേരളത്തിന് തിരിച്ചടിയായി. നേരത്തെ രോഹന്‍ കുന്നുമ്മലും അക്ഷയ് ചന്ദ്രനും അര്‍ധസെഞ്ചുറി നേടിയശേഷം അന്‍പതുകളില്‍ തന്നെ പുറത്തായിരുന്നു. മികച്ച തുടക്കത്തെ വലിയ ഇന്നിംഗ്‌സിലേക്ക് കണ്‍വേര്‍ട്ട് ചെയ്യാനാവാതെ നാലുപേര്‍ അമ്പതുകളില്‍ പുറത്തായതാണ് കേരളത്തിന് വലിയ സ്‌കോര്‍ നിഷേധിച്ചത്. കളി നിര്‍ത്തുമ്പോള്‍ 37 റണ്‍സുമായി ഷോണ്‍ ജോര്‍ജും നാലു റണ്‍സുമായി ബേസില്‍ തമ്പിയുമാണ് ക്രീസില്‍. ഹരിയാനയ്ക്കായി കേരളത്തിന്റെ എട്ടു വിക്കറ്റും വീഴ്ത്തിയത് അന്‍ഷുല്‍ കാംബോജ് ആണ്. 27 ഓവറില്‍ 48 റണ്‍സ് വിട്ടുകൊടുത്താണ് അന്‍ഷുല്‍ കാംബോജ് എട്ടു വിക്കറ്റെടുത്തത്. ശേഷിക്കുന്ന രണ്ടു വിക്കറ്റ് കൂടി നേടിയാല്‍ കാംബോജിന് അപൂര്‍വനേട്ടത്തിന് ഉടമയാകാം. 
74 പന്തില്‍ 53 റണ്‍സെടുത്ത അസറുദ്ദീനെയും 146 പന്തില്‍ 52 റണ്‍സെടുത്ത ക്യാപ്റ്റന്‍ സച്ചിന്‍ ബേബിയുടെയും വിക്കറ്റുകള്‍ ചായക്ക് തൊട്ടുമുമ്പ് നഷ്ടമായി. വെളിച്ചക്കുറവ് മൂലം ഇന്നും ആദ്യ സെഷനിലെ കളി നഷ്ടമായപ്പോള്‍ അര്‍ധസെഞ്ചുറിയുമായി ക്രീസിലുണ്ടായിരുന്ന അക്ഷയ് ചന്ദ്രന്റെ വിക്കറ്റാണ് കേരളത്തിന് രണ്ടാം ദിനം ആദ്യം നഷ്ടമായത്. ഇന്നലത്തെ സ്‌കോറിനോട് എട്ട് റണ്‍സ് കൂടി കൂട്ടിച്ചേര്‍ത്ത് അക്ഷയ് ചന്ദ്രന്‍ 59 റണ്‍സെടുത്ത് അന്‍ഷുല്‍ കാംബോജിന്റെ പന്തില്‍ ബൗള്‍ഡായി. ടീം സ്‌കോര്‍ 150 കടന്നതിന് പിന്നാലെ നാല് റണ്‍സെടുത്ത ജലജ് സക്‌സേനയെ അന്‍ഷുല്‍ കാംബോജ് വിക്കറ്റിന് മുന്നില്‍ കുടുക്കി കേരളത്തിന് ഇരട്ടപ്രഹരമേല്‍പ്പിച്ചു. പിന്നാലെ സല്‍മാന്‍ നിസാറിനെ(0) പൂജ്യനായി മടക്കിയ അന്‍ഷുല്‍ കാംബോജ് അഞ്ച് വിക്കറ്റ് നേട്ടം തികച്ചു. പിന്നീട് 64 റണ്‍സ് കൂട്ടുകെട്ടിലൂടെ അസറുദ്ദീന്‍സച്ചിന്‍ ബേബി സഖ്യം കേരളത്തെ കരകയറ്റി. ചായക്ക് തൊട്ടു മുമ്പ് അസറുദ്ദീനെയും സച്ചിന്‍ ബേബിയെയും നിധീഷിനെയും വീഴ്ത്തിയ അന്‍ഷുല്‍ കാംബോജ് എട്ടു വിക്കറ്റ് നേട്ടം തികച്ചു. കനത്ത മൂടല്‍ മഞ്ഞ് മൂലം കാഴ്ച പരിധി കുറഞ്ഞതിനാല്‍ ആദ്യ സെഷനില്‍ മത്സരം പൂര്‍ണമായും തടസപ്പെട്ടിരുന്നു. രണ്ടാം ദിനം വെളിച്ചക്കുറവാണ് വില്ലനായത്. പോയന്റ് പട്ടികയില്‍ ഒന്നാം സ്ഥാനത്തുള്ള ഹരിയാനക്കെതിരെ മികച്ച ഒന്നാം ഇന്നിംഗ്‌സ് സ്‌കോറാണ് കേരളം ലക്ഷ്യമിടുന്നത്.