/kalakaumudi/media/agency_attachments/zz0aZgq8g5bK7UEc9Bb2.png)
/kalakaumudi/media/media_files/2024/11/03/WMM2sFnlJlSmzx96x4mV.JPG)
Virat Kohli reacts during the third Test
ഇന്ത്യ ന്യൂസീലന്‍ഡ് മൂന്നാം ടെസ്റ്റില്‍ പരാജയപ്പെട്ടതിന് പിന്നാലെ ആരാധകര്‍ക്കിടയില്‍ നിരാശയിലാണ്. മത്സരത്തിന്റെ രണ്ടാം ഇന്നിങ്‌സിലും നിരാശപ്പെടുത്തിയതോടെ വിരാട് കോലിക്കെതിരെ ആരാധകരുടെ രൂക്ഷവിമര്‍ശനം. രണ്ടാം ഇന്നിങ്‌സില്‍ ഏഴു പന്തുകള്‍ നേരിട്ട കോലി ഒരു റണ്‍ മാത്രമെടുത്തു പുറത്തായിരുന്നു.
അജാസ് പട്ടേലിന്റെ പന്തില്‍ ഡാരില്‍ മിച്ചല്‍ ക്യാച്ചെടുത്താണു കോലിയെ മടക്കിയത്. ക്യാപ്റ്റന്‍ രോഹിത് ശര്‍മ (11 റണ്‍സ്), ശുഭ്മന്‍ ഗില്‍ (നാലു പന്തില്‍ ഒന്ന്) എന്നിവരെ നഷ്ടപ്പെട്ടതിനു പിന്നാലെയാണ് കോലിയും പുറത്തായത്. ആദ്യ ഇന്നിങ്‌സിലും കോലി ബാറ്റിങ്ങില്‍ നിരാശപ്പെടുത്തിയിരുന്നു.
ആറു പന്തുകള്‍ നേരിട്ട താരം നാലു റണ്‍സെടുത്തു റണ്‍ഔട്ടാകുകയായിരുന്നു. പുണെയില്‍ 1,17 എന്നിങ്ങനെയായിരുന്നു കോലിയുടെ സ്‌കോറുകള്‍. തുടര്‍ച്ചയായി നിരാശയുണ്ടാക്കുന്ന പ്രകടനങ്ങളാണ് കോലി മത്സരങ്ങളില്‍ കാഴ്ചവെച്ചതെന്നാണ് ആരാധകരുടെ കണ്ടെത്തല്‍.
കോലി ഇംഗ്ലണ്ടിലേക്കു പോയി അവിടെ സ്ഥിരതാമസമാക്കുന്നതാണു നല്ലതെന്ന് ഒരു ആരാധകന്‍ എക്‌സ് പ്ലാറ്റ്‌ഫോമില്‍ തുറന്നടിച്ചു. ''ക്രിക്കറ്റിനും പരസ്യ ഷൂട്ടിങ്ങിനുമായി മാത്രം കോലി ഇന്ത്യയിലേക്കു വരുന്നത് ഒരുപാടു കാലം നീളില്ല. കോലിക്കൊപ്പം രോഹിത് ശര്‍മയും വിരമിക്കണം. ബോര്‍ഡര്‍ ഗാവസ്‌കര്‍ ട്രോഫിയില്‍ എന്തു ചെയ്താലും കാര്യമില്ല, നാട്ടില്‍ വൈറ്റ് വാഷ് ആകുന്നത് അവരുടെ കരിയറിന് കളങ്കമാകും.'' ഒരു ആരാധകന്‍ പ്രതികരിച്ചു.
ഇങ്ങനെയൊരു പ്രകടനം നടത്തിയിട്ട് കോലി എത്ര സെഞ്ചറിയടിച്ചിട്ടുണ്ടെന്നു പറഞ്ഞാലും കാര്യമില്ലെന്നായിരുന്നു മറ്റൊരു ആരാധകന്റെ പ്രതികരണം. ''ഒന്നുകില്‍ ക്രിക്കറ്റില്‍ ശ്രദ്ധിക്കുക, അല്ലെങ്കില്‍ വിരമിച്ച് കുടുംബ കാര്യങ്ങള്‍ നോക്കുക. നിങ്ങളുടെ നിലവാരം എത്രത്തോളം ഉണ്ടായാലും അതിലൊന്നും കാര്യമില്ല.'' എക്‌സ് പ്ലാറ്റ്‌ഫോമില്‍ ഒരു ആരാധകന്‍ വിമര്‍ശിച്ചു.