യൂറോ കപ്പ് 2024; ഓരോ ​ഗോൾ വീതം അടിച്ച് സമനിലയിൽ പിരിഞ്ഞ്  ഇം​ഗ്ലണ്ടും ഡെന്മാർക്കും

യൂറോ കപ്പ്  ഗ്രൂപ്പ് സിയിലെ മത്സരത്തിൽ ഇം​ഗ്ലണ്ടും ഡെന്മാർക്കും ഓരോ ​ഗോൾ വീതം അടിച്ചു സമനിലയിൽ പിരിഞ്ഞു. 18-ാം മിനിട്ടിൽ നായകൻ ഹാരി കെയ്നാണ് ഒരൊറ്റ ​ഗോളിൽ ഇം​ഗ്ലണ്ടിനെ  മുന്നിലെത്തിച്ചത്. ബോക്സിന്റെ മധ്യഭാഗത്ത് നിന്ന് തൊടുത്ത ഇടംകാൽ ഷോട്ട് ​ഗോളിക്ക് അവസരം നൽകാതെ ബോക്സിന്റെ ഇടതുമൂലയിലേക്ക് പതിക്കുകയായിരുന്നു.

എന്നാൽ പിന്നീട് കടലാസിലെ കരുത്തിന്റെ ഏഴയലത്തുപോലും ഇല്ലാതിരുന്ന ഇം​ഗ്ലണ്ടിനെയാണ് കളത്തിൽ കണ്ടത്.പന്തടക്കത്തിലും ​ഷോട്ടുകളിലും ആധിപത്യം പുലർത്തിയ ഡെന്മാർക്ക് ഇം​ഗ്ലണ്ടിനെ അത്യന്തം വിറപ്പിച്ചു. 34-ാം മിനിട്ടിലാണ് ഇം​ഗ്ലണ്ട് ആദ്യം ഞെട്ടിയത്. മോർട്ടൻ ഹ്യൂൽമൺഡ് ബോകിസിന് പുറത്ത് നിന്ന് തൊടുത്ത അത്യു​ഗ്രൻ ഷോട്ട് ഇം​ഗ്ലണ്ട് വല തുളയ്‌ക്കുകയായിരുന്നു. വിക്ടർ ക്രിസ്റ്റ്യൻസൻ നൽകിയ പന്താണ് ഇം​ഗ്ലണ്ട് പ്രതിരോധം മറികടന്ന് വലയിൽ പതിച്ചത്.

രണ്ടാം പകുതിയിലും നിറം മങ്ങിയ ഇം​ഗ്ലണ്ടിനെയാണ് കാണാൻ സാധിച്ചത്. ഡെന്മാർക്ക് പലപ്പോഴും ഇം​ഗ്ലണ്ട് പ്രതിരോധം ഭേദിച്ച് ബോക്സിലേക്ക് കടന്നു കയറിയപ്പോഴും കൂട്ടപ്പൊരിച്ചിലിനൊടുവിലാണ് ​ഗോൾ വഴങ്ങാതെ രക്ഷപ്പെട്ടത്. രണ്ടാം പകുതിയിൽ സൗത്ത് ​ഗേറ്റ് മുന്നേറ്റ നിരയെ ഒന്നാകെ മാറ്റിയെങ്കിലും ഇം​ഗ്ലണ്ടിന്റെ ആക്രമണത്തിന് മൂർച്ചയില്ലായിരുന്നു. ഇം​ഗ്ലണ്ടാണ് ​ഗ്രൂപ്പിൽ തലപ്പത്തുള്ളതെങ്കിലും റൗണ്ടിലെ അവസാന മത്സരങ്ങളാകും നോക്കൗട്ടിലാരാെക്കെയെന്ന് തീരുമാനിക്കുക.