ദിമിക്ക് ഇരട്ടഗോള്‍; ചലഞ്ച് ലീഗില്‍ ചാമ്പ്യന്‍മാര്‍ ഈസ്റ്റ് ബംഗാള്‍

സ്‌ട്രൈക്കര്‍ ദിമിത്രിയോസ് ദയമന്റകോസിന്റെ മികവില്‍ ലെബനീസ് ക്ലബായ നെജ്‌മെഹ് എസ് സിയെ പരാജയപ്പെടുത്തി ഈസ്റ്റ് ബംഗാള്‍. വെള്ളിയാഴ്ച നടന്ന ആവേശകരമായ പോരാട്ടത്തില്‍ രണ്ടിനെതിരെ മൂന്നു ഗോളുകള്‍ക്കായിരുന്നു ഈസ്റ്റ് ബംഗാളിന്റെ വിജയം. ഈ വിജയം ഈസ്റ്റ് ബംഗാളിന്റെ എ എഫ് സി ചാലഞ്ച് ലീഗില്‍ ഗ്രൂപ്പില്‍ ഒന്നാമതാക്കുകയും ക്വാര്‍ട്ടര്‍ ഫൈനലിലേക്ക് മുന്നേറാന്‍ സഹായിക്കുകയും ചെയ്തു.

എട്ടാം മിനുട്ടില്‍ ഒരു സെല്‍ഫ് ഗോളിലൂടെ ഈസ്റ്റ് ബംഗാള്‍ ആണ് ആദ്യം ലീഡ് എടുത്തത്. 15ആം മിനുട്ടില്‍ ദിമി ലീഡ് ഇരട്ടിയാക്കി. 18ആം മിനുട്ടില്‍ ഒപാരെയിലൂടെ ലെബനീസ് ക്ലബ് കളിയിലേക്ക് തിരികെ വന്നു. 43ആം മിനുട്ടില്‍ മോന്‍സറിലൂടെ സമനിലയും പിടിച്ചു.

രണ്ടാം പകുതിയില്‍ വിജയ ഗോളിനായി ആഞ്ഞു ശ്രമിച്ച ഈസ്റ്റ് ബംഗാള്‍ 77ആം മിനുട്ടില്‍ ദിമിയിലൂടെ വിജയം ഉറപ്പിച്ച മൂന്നാം ഗോള്‍ നേടി. പെനാള്‍റ്റിയില്‍ നിന്നായിരുന്നു ഈ ഗോള്‍. ദിമി അവസാന നാലു മത്സരങ്ങളില്‍ നിന്ന് ഈസ്റ്റ് ബംഗാളിനായി 5 ഗോളുകള്‍ സ്‌കോര്‍ ചെയ്തു.