ഡി സോര്‍സിക്കും സ്റ്റബ്‌സിനും സെഞ്ചുറി; ദക്ഷിണാഫ്രിക്ക മികച്ചനിലയില്‍

ബംഗ്ലാദേശിനെതിരായ രണ്ടാം ടെസ്റ്റില്‍ ദക്ഷിണാഫ്രിക്ക മികച്ച സ്‌കോറിലേക്ക്. രണ്ടാം ടെസ്റ്റിന്റെ ആദ്യ ദിവസം ടോണി ഡി സോര്‍സിയുടെയും ട്രിസ്റ്റന്‍ സ്റ്റബ്‌സിന്റെയും തകര്‍പ്പന്‍ സെഞ്ചുറിയുടെ കരുത്തില്‍ ദക്ഷിണാഫ്രിക്ക രണ്ടു വിക്കറ്റ് നഷ്ടത്തില്‍ 307 റണ്‍സെന്ന നിലയിലാണ്. 141 റണ്‍സുമായി ടോണി ഡി സോര്‍സി ക്രീസില്‍ തുടരുമ്പോള്‍ സ്റ്റബ്‌സ് 106 റണ്‍സെടുത്ത് പുറത്തായി. 18 റണ്‍സുമായി ഡേവിഡ് ബേഡിങ്ങാമാണ് ഡി സോര്‍സിക്കൊപ്പം ക്രീസില്‍. ഓപ്പണറും ക്യാപ്റ്റനുമായ എയ്ഡന്‍ മാര്‍ക്രം 33 റണ്‍സെടുത്ത് പുറത്തായി. രണ്ടു വിക്കറ്റുകളും തൈജുല്‍ ഇസ്ലാമിനാണ്. 
മത്സരത്തില്‍ ടോസ് നേടിയ ദക്ഷിണാഫ്രിക്ക ബാറ്റിങ് തിരഞ്ഞെടുക്കുകയായിരുന്നു. ഓപണറുമാരായ എയ്ഡാന്‍ മാക്രവും ടോണി ഡി സോര്‍സിയും മികച്ച തുടക്കമാണ് ദക്ഷിണാഫ്രിക്കയ്ക്ക് നല്‍കിയത്. ആദ്യ വിക്കറ്റില്‍ ഇരുവരും ചേര്‍ന്ന് 69 റണ്‍സ് കൂട്ടിച്ചേര്‍ത്തു. 33 റണ്‍സെടുത്ത മാക്രത്തെ തൈജുള്‍ ഇസ്ലാം മോമിനുള്‍ ഹക്കിന്റെ കൈകളിലെത്തിച്ചു. സ്റ്റബ്‌സ് തൈജുലിന്റെ പന്തില്‍ ക്ലീന്‍ബൗള്‍ഡ് ആവുകയായിരുന്നു.