ന്യൂഡല്ഹി: പറന്നുയര്ന്ന വിമാനത്തിന്റെ എയര് കണ്ടീഷനിങ് (എ.സി.) യൂണിറ്റില് തീപ്പിടിത്തമുണ്ടായെന്ന സംശയത്തെ തുടര്ന്ന് വിമാനം തിരിച്ചിറക്കി. ഡല്ഹിയിലെ ഇന്ദിരാ ഗാന്ധി അന്താരാഷ്ട്ര വിമാനത്താവളത്തിലാണ് സംഭവം. ഡല്ഹിയില്നിന്ന് ബെംഗളൂരുവിലേക്ക് പുറപ്പെട്ട എയര് ഇന്ത്യയുടെ എ.ഐ.-807 വിമാനമാണ് അടിയന്തരമായി തിരിച്ചിറക്കിയത്.
അതേസമയം 175 യാത്രക്കാരായിരുന്നു വിമാനത്തിലുണ്ടായിരുന്നത്. തീപ്പിടിത്തമുണ്ടായെന്ന സംശയത്തിന് പിന്നാലെ വെള്ളിയാഴ്ച വൈകിട്ട് 5.52-ഓടെ വിമാനത്താവളത്തില് എമര്ജന്സി പ്രഖ്യാപിച്ചു. തുടര്ന്ന് 6.38-ഓടെ വിമാനം സുരക്ഷിതമായി നിലത്തിറക്കി. യാത്രക്കാര്ക്ക് ബെംഗളൂരുവിലേക്ക് യാത്ര തുടരാന് ബദല്സംവിധാനം ഏര്പ്പെടുത്തിയതായും എയര്ലൈന് അധികൃതര് അറിയിച്ചു.വൈകുന്നേരം ആറേകാലോടെ തീപ്പിടിത്തവുമായി ബന്ധപ്പെട്ട് വിമാനത്താവളത്തില്നിന്ന് ഫോണ് വന്നുവെന്നും തുടര്ന്ന് മൂന്ന് യൂണിറ്റുകളെ അവിടേക്ക് അയച്ചതായും ഡല്ഹി ഫയര് സര്വീസ് വ്യക്തമാക്കി.