രാജസ്ഥാനിലെ ജയ്പൂരിൽ നിരവധി സ്‌കൂളുകൾക്ക് ബോംബ് ഭീഷണി സന്ദേശം; വിദ്യാർത്ഥികളെ ഒഴിപ്പിച്ചു,അന്വേഷണം

ന്യൂഡൽഹി: രാജസ്ഥാനിലെ ജയ്പൂരിലെ നിരവധി സ്‌കൂളുകൾക്ക് നേരെ ഇമെയിൽ വഴി ബോംബ് ഭീഷണി.നാല് സ്കൂളുകൾക്കെങ്കിലും ഭീഷണി ഇമെയിലുകൾ ലഭിച്ചതായാണ് വിവരം.തുടർന്ന് സ്കൂളുകളിലെ വിദ്യാർത്ഥികളെയും ജീവനക്കാരെയും ഒഴിപ്പിച്ചു.പോലീസ് സംഘങ്ങളും ബോംബ്, ഡോഗ് സ്ക്വാഡുകളും സ്കൂളുകളിൽ എത്തിയിട്ടുണ്ട്. ഭീഷണി സന്ദേശം ലഭിച്ച സ്‌കൂളുകളിൽ പോലീസ് സംഘത്തെ വിന്യസിച്ചതായി ജയ്പൂർ പോലീസ് കമ്മീഷണർ ബിജു ജോർജ്ജ് ജോസഫ് പറഞ്ഞു.

ഇമെയിൽ വഴിയാണ് ഭീഷണി സന്ദേശം ലഭിച്ചതെന്നും പിന്നിൽ പ്രവർത്തിച്ചവരെ കണ്ടെത്താൻ ഒരു സംഘം ശ്രമിക്കുന്നുണ്ടെന്നും പൊലീസ് അറിയിച്ചു.ഡൽഹി-എൻസിആർ മേഖലയിലെ 150-ലധികം സ്‌കൂളുകൾക്ക് നേരെ സമാനമായ ഭീഷണികൾ ലഭിച്ച് 12 ദിവസങ്ങൾക്ക് ശേഷമാണ് പുതിയ സംഭവം.

ഞായറാഴ്ച 20 ആശുപത്രികൾക്കും ഐജിഐ വിമാനത്താവളത്തിനും ഡൽഹിയിലെ നോർത്തേൺ റെയിൽവേയുടെ സിപിആർഒ ഓഫീസിനും ഇത്തരത്തിൽ ഇമെയിലുകളിലൂടെ ബോംബ് ഭീഷണിയുണ്ടായിരുന്നു.ഡൽഹിയിലെ സ്‌കൂളുകൾക്ക് റഷ്യ ആസ്ഥാനമായുള്ള മെയിലിൽ നിന്ന് ഭീഷണി സന്ദേശം ലഭിച്ചപ്പോൾ, ആശുപത്രികൾക്കും മറ്റ് രണ്ട് ഇൻസ്റ്റാളേഷനുകൾക്കും യൂറോപ്പ് ആസ്ഥാനമായുള്ള മെയിലിംഗ് സേവന കമ്പനിയായ 'beeble.com' ൽ നിന്നാണ് ഭീഷണി സന്ദേശം ലഭിച്ചത്. 

മെയ് ഒന്നിന് ഡൽഹി-എൻസിആറിലെ നിരവധി സ്‌കൂളുകളിൽ സ്‌ഫോടകവസ്തുക്കൾ ഉണ്ടെന്ന വ്യാജ ഇമെയിലുകൾ ലഭിച്ചതിനു പിന്നാലെ കനത്ത ജാ​ഗ്രതയിലായിരുന്നു രാജ്യം.തുടർന്നുള്ള അന്വേഷണങ്ങൾ, ഡാർക്ക് വെബ് പങ്കാളിത്തം സംബന്ധിച്ച സംശയങ്ങളും ആ ഇമെയിലുകളുടെ ഉത്ഭവം റഷ്യയിലാണെന്ന് കണ്ടെത്തിയിരുന്നു.

കഴിഞ്ഞു കുറച്ചുനാളുകളായി ർദ്ധിച്ചുവരുന്ന ഭീഷണികൾക്ക് മറുപടിയായി, സുരക്ഷാ നടപടികൾ വിലയിരുത്താൻ കേന്ദ്ര ആഭ്യന്തര സെക്രട്ടറി അജയ് ഭല്ല മുതിർന്ന ഉദ്യോഗസ്ഥരുമായി യോഗം ചേർന്നു.സുരക്ഷാ ഇൻഫ്രാസ്ട്രക്ചർ വർധിപ്പിക്കുക, സിസിടിവി ക്യാമറകൾ സ്ഥാപിക്കുക, ഇത്തരം സംഭവങ്ങൾ ഫലപ്രദമായി നേരിടാൻ പ്രോട്ടോക്കോളുകൾ നടപ്പിലാക്കുക എന്നിവയുടെ പ്രാധാന്യം ചർച്ച വിഷയമായി.