'തെറ്റിദ്ധരിപ്പിക്കുന്ന പരസ്യങ്ങൾ ആവർത്തിക്കരുത്';പതഞ്ജലിക്കെതിരായ കോടതിയലക്ഷ്യ കേസ് അവസാനിപ്പിച്ച് സുപ്രീംകോടതി

ന്യൂഡൽഹി: പതഞ്ജലിക്കെതിരായ കോടതിയലക്ഷ്യ കേസ്  അവസാനിപ്പിച്ച് സുപ്രീംകോടതി.വ്യാജ പരസ്യങ്ങളിൽ പതഞ്ജലിക്ക് താക്കീത് നൽകിയാണ് കോടതിയുടെ നടപടി.ജസ്റ്റിസ് ഹിമ കോഹ്‌ലി, ജസ്റ്റിസ് അഹ്‌സനുദ്ദീൻ അമാനുല്ല എന്നിവരടങ്ങിയ ബെഞ്ച് മെയ് 14ന് കോടതിയലക്ഷ്യ നോട്ടീസ് പുറപ്പെടുവിച്ചത്. കൊവിഡ് വാക്‌സിനേഷൻ ഡ്രൈവിനും മോഡേൺ മെഡിസിനും എതിരെ പതഞ്ജലി അപകീർത്തികരമായ പ്രചാരണം നടത്തിയെന്ന് ആരോപിച്ച് ഇന്ത്യൻ മെഡിക്കൽ അസോസിയേഷൻ (ഐഎംഎ) സമർപ്പിച്ച ഹർജിയിലാണ് കേസ്.

ഉപഭോക്താക്കളെ തെറ്റിദ്ധരിപ്പിക്കുന്ന രീതിയിൽ പതഞ്ജലി മരുന്ന് ഉൽപന്നങ്ങളുടെ പരസ്യം നൽകിയതിന് യോഗ ഗുരു രാംദേവും അദ്ദേഹത്തിൻ്റെ സഹായി ആചാര്യ ബാലകൃഷ്ണയും പത്ര പരസ്യത്തിലൂടെ മാപ്പ് പറഞ്ഞിരുന്നു. ഞങ്ങളുടെ പരസ്യങ്ങൾ പ്രസിദ്ധീകരിക്കുന്നതിൽ സംഭവിച്ച തെറ്റിന് ഞങ്ങൾ ആത്മാർത്ഥമായി ക്ഷമ ചോദിക്കുന്നു, അത്തരം തെറ്റുകൾ ആവർത്തിക്കില്ല എന്നത് ഞങ്ങൾ ഉറപ്പ് നൽകുന്നു," മാപ്പപേക്ഷയിൽ പറഞ്ഞിരുന്നു. 

കോവിഡ് -19 മാഹാമാരി സമയത്ത് കോറോണിൽ പോലുള്ള ഉൽപ്പന്നങ്ങളുടെ ഔഷധ ഫലപ്രാപ്തിയെക്കുറിച്ച് പതഞ്ജലി നൽകിയ പരസ്യങ്ങളിൽ രാംദേവും ബാലകൃഷ്ണയും നിരുപാധികമായ മാപ്പ് സുപ്രീം കോടതിയിൽ സമർപ്പിച്ചിരുന്നു. നടപടി ആവശ്യപ്പെട്ട് ഇന്ത്യൻ മെഡിക്കൽ അസോസിയേഷൻ (ഐഎംഎ) നൽകിയ ഹർജിയെത്തുടർന്ന്, ആധുനിക വൈദ്യശാസ്ത്രത്തെ വിമർശിച്ചതിന് രാംദേവിനെതിരെ 1954 ലെ ഡ്രഗ്‌സ് ആൻഡ് മാജിക് റെമഡീസ് (ഒബ്ജക്ഷനബിൾ അഡ്വർടൈസ്‌മെൻ്റ്) നിയമത്തിൽ വ്യക്തമാക്കിയിട്ടുള്ള അസുഖങ്ങളും വൈകല്യങ്ങളും ചികിത്സിക്കുമെന്ന് അവകാശപ്പെടുന്ന പതഞ്ജലി ഉൽപ്പന്നങ്ങളുടെ എല്ലാ പരസ്യങ്ങളും നിർത്താൻ സുപ്രീം കോടതി നിർദ്ദേശിച്ചു.

സുപ്രീം കോടതിയുടെ രൂക്ഷമായ വിമർശനത്തിന് ശേഷം, പതഞ്ജലി ആയുർവേദ് ഒരു സത്യവാങ്മൂലത്തിൽ നിരുപാധികം മാപ്പ് പറഞ്ഞു, പതഞ്ജലിയുടെ ഉദ്ദേശ്യം ഈ രാജ്യത്തെ പൗരന്മാരെ അതിൻ്റെ ഉൽപ്പന്നങ്ങൾ ഉപയോഗിച്ച് ആരോഗ്യകരമായ ജീവിതം നയിക്കാൻ പ്രോത്സാഹിപ്പിക്കുക മാത്രമാണെന്നും പ്രസ്താവിച്ചു. 2023 നവംബറിൽ, ആധുനിക വൈദ്യശാസ്ത്ര സമ്പ്രദായത്തിനെതിരെ തെറ്റിദ്ധരിപ്പിക്കുന്ന അവകാശവാദങ്ങളും പരസ്യങ്ങളും അവസാനിപ്പിക്കാൻ പതഞ്ജലി ആയുർവേദിനോട് സുപ്രീം കോടതി ആവശ്യപ്പെട്ടു. പ്രസ്താവനകളോ അടിസ്ഥാനരഹിതമായ അവകാശവാദങ്ങളോ ഉന്നയിക്കില്ലെന്ന് പതഞ്ജലി കോടതിക്ക് ഉറപ്പ് നൽകിയിരുന്നു.