റോഡിന്റെ ശോചനീയാവസ്ഥ: പ്രതികരണവുമായി നിതിൻ ഗഡ്കരി

ലഖ്നൗ:രാജ്യത്തെ മോശമായ റോഡുകളുടെ പേരിൽ ഏജൻസികളേയും കരാറുകാരെയും വിമർശിച്ച് കേന്ദ്രമന്ത്രി നിതിൻ ​ഗഡ്കരി. മോശമായി പ്രവർത്തിക്കുന്നവരുടെ ബാങ്ക് ​ഗ്യാരണ്ടി കണ്ടുകെട്ടും. പുതിയ ടെൻഡറുകൾക്ക് അപേക്ഷിക്കാൻ ഇവരെ അനുവദിക്കില്ലെന്നും കേന്ദ്രമന്ത്രി അറിയിച്ചു.

ഈസ്റ്റേൺ പെരിഫറൽ എക്‌സ്പ്രസ് വേയുടെ മോശം അവസ്ഥയാണ് വിമർശനത്തിന് വഴിവെച്ചത്. ​ഗാസിയാബാദിൽ വൃക്ഷത്തെ നടീൽയജ്ഞം ഉദ്ഘാടനം ചെയ്യാൻ ഈ വഴി യാത്ര ചെയ്തതിന് പിന്നാലെയാണ് മന്ത്രിയുടെ വിമർശനം.

'വളരെ കാലത്തിന് ശേഷമാണ് ഈസ്റ്റേൺ പെരിഫറൽ എക്സ്പ്രസ് വേ ഉപയോ​ഗിക്കുന്നത്. ജോലി ചെയ്യാതിരിക്കുന്ന നിരവധി ആളുകൾ വിരമിക്കണമെന്ന് ഇപ്പോൾ ഞാൻ ആ​ഗ്രഹിക്കുന്നു. വളരെ മോശമായ രീതിയിലാണ് ഈ റോഡിന്റെ പരിപാലനവും അറ്റകുറ്റപ്പണിയും നടത്തുന്നത്.

ഞങ്ങൾ നിങ്ങളെ വെറുതെവിടില്ല. ബാങ്ക് ​ഗ്യാരണ്ടി കണ്ടുകെട്ടും. തുടർന്ന്, കരാറുകാരെ കരിമ്പട്ടികയിൽ പെടുത്തും. പുതിയ ടെൻഡറുകൾക്ക് അപേക്ഷിക്കാൻ ഇവരെ അനുവദിക്കില്ല. കൃത്യമായി കാര്യങ്ങൾ ചെയ്യുന്നവർക്ക് അവാർഡ് നൽകും. എന്നാൽ, മോശം രീതിയിലാണ് പ്രവർത്തനമെങ്കിൽ സംവിധാനത്തിൽ നിന്നും അവരെ പുറത്താക്കും', ​ഗഡ്കരി പറഞ്ഞു.