മുസ്ലിം പിന്നാക്കാവസ്ഥ: 'സച്ചാർ കമ്മിറ്റി റിപ്പോർട്ട് കെട്ടിച്ചമച്ചത്'; മോദിക്ക് പിന്നാലെ വര്‍ഗീയ പരാമർശവുമായി നദ്ദയും

കോണ്‍ഗ്രസ് തിരഞ്ഞെടുപ്പ് പ്രകടന പത്രികയുമായി ബന്ധപ്പെടുത്തി മുസ്ലിം വിരുദ്ധ പരാമര്‍ശവുമായി ബിജെപി ദേശീയ അധ്യക്ഷന്‍ ജെ പി നദ്ദ. പിന്നാക്ക വിഭാഗങ്ങളുടെ അവകാശങ്ങളെ തട്ടിയെടുത്ത് മുസ്ലിങ്ങള്‍ക്ക് നല്‍കുമെന്ന് കോണ്‍ഗ്രസ് പ്രകടന പത്രികയില്‍ പറയുന്നുണ്ടെന്നാണ് ജെ പി നദ്ദയുടെ വാദം.

സച്ചാര്‍ കമ്മിറ്റി റിപ്പോര്‍ട്ടിനെതിരെയും നദ്ദ രംഗത്തെത്തി. മുസ്ലിങ്ങളുടെ പിന്നാക്കാവസ്ഥ പഠിച്ച സച്ചാര്‍ കമ്മിറ്റി റിപ്പോര്‍ട്ട് കെട്ടിച്ചമച്ചതാണെന്നായിരുന്നു ബിജെപി അധ്യക്ഷന്റെ ആക്ഷേപം. പ്രധാനമന്ത്രി നരേന്ദ്രമോദിയുടെ മുസ്ലിം വിരുദ്ധ പരാമര്‍ശം വലിയ വിവാദങ്ങളും നിയമപോരാട്ടങ്ങള്‍ക്കും വഴിവെച്ചതിന് പിന്നാലെയാണ് നദ്ദയും സമാനമായ ആക്ഷേപവുമായി രംഗത്തെത്തുന്നത്.

രണ്ടാം ഘട്ട വോട്ടെടുപ്പ് നടക്കുന്ന വെള്ളിയാഴ്ചയാണ് നദ്ദയുടെ പ്രസ്താവന. മോദിയുടെ പ്രസ്താവനയുമായി ബന്ധപ്പെട്ട് പ്രധാനമന്ത്രിക്കും പാർട്ടി അധ്യക്ഷനും കേന്ദ്ര തിരഞ്ഞെടുപ്പ് കമ്മിഷൻ വിശദീകരണമാവശ്യപ്പെട്ട് നോട്ടിസ് അയച്ചതിന് തൊട്ടുപിന്നാലെയാണ് പുതിയ പരാമർശം.

പട്ടികജാതി/വർഗ, ഒബിസി വിഭാഗങ്ങളുടെ അവകാശങ്ങൾ തട്ടിയെടുത്ത് മുസ്ലിങ്ങൾക്ക് നൽകുക എന്നതാണ് കോൺഗ്രസിൻ്റെയും ഇന്ത്യാ സഖ്യത്തിൻ്റെയും രഹസ്യ അജണ്ട എന്നായിരുന്നു ജെ പി നദ്ദയുടെ വാദം. രാജ്യത്തെ വിഭവങ്ങളുടെ ആദ്യ അവകാശം മുസ്ലിങ്ങൾക്കാണെന്ന് കോൺഗ്രസ് പറയുന്നു. എന്നാൽ ആദ്യ അവകാശികൾ ദരിദ്രരാണെന്നാണ് മോദി പറയുന്നതെന്നും നദ്ദ പറഞ്ഞു. കോൺഗ്രസ് മുസ്ലിം പ്രീണനനത്തിനു ശ്രമിക്കുകയാണെന്നും ഒരു പ്രത്യേക മതവിഭാഗത്തോട് ചായ്‌വുള്ളവരാണെന്നും അദ്ദേഹം കുറ്റപ്പെടുത്തി.