ലോറൻസ് ബിഷ്‍ണോയ്‍യുടെ ജീവിതം വെബ് സീരീസ് ആവുന്നു

ന്യൂഡൽഹി: കുപ്രസിദ്ധ കുറ്റവാളി ലോറൻസ് ബിഷ്‍ണോയ്‍യുടെ ജീവിതം വെബ് സിരീസിലൂടെ എത്തുന്നു. ജാനി ഫയർ ഫോക്സ് പ്രൊഡക്ഷൻ ഹൗസ് ആണ് വെബ് സിരീസ് പ്രഖ്യാപിച്ചിരിക്കുന്നത്. ലോറൻസ്- എ ഗ്യാങ്സ്റ്റർ സ്റ്റോറി എന്ന പേരിലായിരിക്കും സിരീസ് എത്തുക. ഈ ടൈറ്റിലിന് ഇന്ത്യൻ മോഷൻ പിക്ചേഴ്സ് അസോസിയേഷൻറെ അനുമതി ലഭിച്ചു. 

യഥാർഥ സംഭവങ്ങളെ ആസ്പദമാക്കി ചിത്രങ്ങൾ ഒരുക്കുന്നതിലൂടെ ശ്രദ്ധ നേടിയ നിർമ്മാണ കമ്പനിയാണ് ജാനി ഫയർ ഫോക്സ്. ഒരു പൊലീസ് കോൺസ്റ്റബിളിൻറെ മകനിൽ നിന്ന് അന്തർദേശീയ തലത്തിൽ കുപ്രസിദ്ധി നേടിയ ഗ്യാങ്സ്റ്റർ എന്ന നിലയിലേക്കുള്ള ലോറൻസ് ബിഷ്ണോയ്‍യുടെ മാറ്റത്തെ ആഴത്തിൽ പരിശോധിക്കുന്ന സിരീസ് ആയിരിക്കും ഇതെന്ന് അണിയറക്കാർ പറയുന്നു. അതേസമയം ലോറൻസ് ബിഷ്ണോയ്‍ ആയി അഭിനയിക്കുന്ന നടൻ ആരെന്ന വിവരം അണിയറപ്രവർത്തകർ പുറത്തുവിട്ടിട്ടില്ല. ദീപാവലിക്ക് ശേഷം സിരീസിൻറെ ഫസ്റ്റ് ലുക്കും മറ്റ് വിവരങ്ങളും വ്യക്തമാക്കുമെന്നാണ് വിവരം.

എ ടെയ്‍ലർ മർഡർ സ്റ്റോറി, കറാച്ചി ടു നോയ്ഡ എന്നിവയാണ് ജാനി ഫയർ ഫോക്സ് നേരത്തെ പ്രഖ്യാപിച്ച ചിത്രങ്ങൾ. രാജസ്ഥാനിലെ ഉദയ്പൂരിൽ നടന്ന കനയ്യ ലാൽ എന്ന തയ്യൽക്കാരൻറെ കൊലപാതകത്തെ ആസ്പദമാക്കിയുള്ള ചിത്രമാണ് ടെയ്ലർ മർഡർ സ്റ്റോറി. കാമുകൻ സച്ചിൻ മീണയ്ക്കൊപ്പം കഴിയാൻ അനധികൃതമായി ഇന്ത്യയിലേക്ക് കടന്ന പാകിസ്ഥാൻ യുവതി സീമ ഹൈദറിൻറെ കഥ പറയുന്ന ചിത്രമാണ് കറാച്ചി ടു നോയ്ഡ.