ഡൽഹി മദ്യനയ കേസ്: കേജ്‍രിവാളിൻറെ ജുഡീഷ്യൽ കസ്റ്റഡി ഈ മാസം 23 വരെ നീട്ടി ഡൽഹി കോടതി

ന്യൂഡൽഹി: ഡൽഹി മദ്യനയക്കേസിൽ കേജ്‍രിവാളിൻറെ ജുഡീഷ്യൽ കസ്റ്റഡി ഡൽഹി റൗസ് അവന്യൂ കോടതി ഈ മാസം 23 വരെ നീട്ടി. അറസ്റ്റ് നടപടിയെ ചോദ്യം ചെയ്തുള്ള ഡൽഹി മുഖ്യമന്ത്രി അരവിന്ദ് കേജ്‍രിവാളിൻറെ ഹർജി നേരത്തെ പരിഗണിക്കില്ലെന്ന് സുപ്രീംകോടതി വ്യക്തമാക്കി. 

കേജ്‍രിവാൾ സുപ്രീംകോടതിയിൽ സമർപ്പിച്ച ഹർജിയിൽ എൻഫോഴ്സ്മെന്റ് ഡയറക്ടറേറ്റ് ഉൾപ്പെടെയുള്ള കക്ഷികൾക്ക് നോട്ടിസയച്ച ജസ്റ്റിസ് സഞ്ജീവ് ഖന്ന അധ്യക്ഷനായ ബെഞ്ച്, ഹർജി 29നു പരിഗണിക്കുമെന്ന് വ്യക്തമാക്കി. തിരഞ്ഞെടുപ്പു പ്രചാരണത്തിന് ഇറങ്ങുന്നതിനെ ബാധിക്കുമെന്ന് കേജ്‍രിവാളിൻറെ അഭിഭാഷകൻ അഭിഷേക് മനു സിങ്‍വി വാദിച്ചെങ്കിലും ഇ.ഡി അതിനെ എതിർത്തു. ഹർജി നേരത്തെ പരിഗണിക്കണമെന്ന സിങ്‍വിയുടെ അഭ്യർഥനയും കോടതി അംഗീകരിച്ചില്ല. 

ഇ.ഡി അറസ്റ്റ് ചെയ്തതിനെതിരെ കേജ്‍രിവാള്‍ സമര്‍പ്പിച്ച ഹര്‍ജി ഡല്‍ഹി ഹൈക്കോടതി തള്ളിയതിനു പിന്നാലെയായിരുന്നു കേജ്‍രിവാള്‍ സുപ്രീംകോടതിയെ സമീപിച്ചത്.