' കേന്ദ്രവുമായുള്ള മോശം ബന്ധം കശ്മീരിന് ​ഗുണം ചെയ്യില്ല': ഒമർ അബ്ദുള്ള

ശ്രീന​ഗർ: കേന്ദ്രസർക്കാരുമായുള്ള മോശംബന്ധം ജമ്മു-കശ്മീരിന് ​ഗുണം ചെയ്യില്ലെന്ന് നാഷണൽ കോൺഫറൻസ് (എൻ.സി.) നേതാവ് ഒമർ അബ്ദുള്ള. നിയമസഭാ തിരഞ്ഞെടുപ്പിൽ ജയം സ്വന്തമാക്കിയതിനു പിന്നാലെ ഒരു ദേശീയമാധ്യമത്തിന് നൽകിയ അഭിമുഖത്തിൽ സംസാരിക്കുകയായിരുന്നു അദ്ദേഹം. കശ്മീരിന്റെ സംസ്ഥാന പദവി പുനഃസ്ഥാപിക്കണമെന്നും അദ്ദേഹം കേന്ദ്രസർക്കാരിനോട് ആവശ്യപ്പെട്ടു. നിയമസഭാ തിരഞ്ഞെടുപ്പിൽ നാഷണൽ കോൺഫറൻസ് - കോൺ​ഗ്രസ് സഖ്യത്തിന്റെ പ്രധാന വാ​ഗ്ദാനമായിരുന്നു കശ്മീരിന്റെ സംസ്ഥാന പദവി പുനഃസ്ഥാപിക്കൽ.

നരേന്ദ്രമോദി മാന്യനായ വ്യക്തിയാണെന്നും കശ്മീരിന് സംസ്ഥാന പദവി തിരികെ തരുമെന്ന് അദ്ദേഹം ജനങ്ങൾക്ക് ഉറപ്പുനൽകിയതാണെന്നും ഒമർ അബ്ദുള്ള പറഞ്ഞു. ആ വാക്ക് പ്രധാനമന്ത്രി പാലിക്കുമെന്നാണ് പ്രതീക്ഷിക്കുന്നതെന്നും അദ്ദേഹം വ്യക്തമാക്കി. 'സാമ്പത്തികവും സാമൂഹികവുമായുള്ള വളർച്ചയുടെ നിർണായക ഘട്ടത്തിലാണ് കശ്മീർ. ഇക്കാര്യത്തിൽ കേന്ദ്രത്തിന്റെ പിന്തുണ ആവശ്യപ്പെട്ടിട്ടുണ്ട്. കേന്ദ്രവുമായി കശ്മീർ സർക്കാരിന് ആരോ​ഗ്യകരമായ ബന്ധം നിലനിൽത്താൽ കഴിയുമെന്നാണ് വിശ്വസിക്കുന്നത്. കശ്മീർ നിർണായക ഘട്ടത്തിലായതിനാൽ ബി.ജെ.പി സർക്കാർ രാഷ്ട്രീയം കളിക്കില്ലെന്നാണ് പ്രതീക്ഷ'- അദ്ദേഹം കൂട്ടിച്ചേർത്തു.

ആർട്ടിക്കിൾ 370 റദ്ദാക്കിയതിന് അഞ്ചുവർഷങ്ങൾക്ക് ശേഷം ജമ്മു കശ്മീരിൽ നടന്ന നിയമസഭാ തിരഞ്ഞെടുപ്പിൽ നാഷണൽ കോൺഫറൻസ് - കോൺ​ഗ്രസ് സഖ്യം 48 സീറ്റുകളാണ് പിടിച്ചടക്കിയത്. 51 സീറ്റുകളിൽ മത്സരിച്ച നാഷണൽ കോൺഫറൻസ് 42 ഇടങ്ങളിലും 32 സീറ്റുകളിൽ മത്സരിച്ച കോൺ​ഗ്രസ് ആറിടങ്ങളിലും വിജയിച്ചു. രണ്ട് സീറ്റുകളിൽ മത്സരിച്ച ഒമർ അബ്ദുള്ള ഈ രണ്ടിടത്തും വിജയിച്ചു. ബദ്ഗാം, ​ഗന്ദേർബാൽ മണ്ഡലങ്ങളിലായിരുന്നു ഒമർ അബ്ദുള്ള മത്സരിച്ചത്.