ലോക്‌സഭയിലേക്ക് എത്തുന്ന സിനിമാതാരങ്ങൾ

18-ാം ലോക്‌സഭയിലേക്കുള്ള തിരഞ്ഞെടുപ്പ് ഫല പ്രഖ്യാപനം പുറത്തുവന്നതോടെ ഇരുമുന്നണികളും കരുക്കൾ നീക്കുന്നത് വലിയ പ്രതീക്ഷയോടെയാണ്. ഒറ്റയ്ക്കുളള ഭൂരിപക്ഷം ഒരു പാർട്ടിക്കും നേടാൻ സാധിച്ചിട്ടില്ല. മുന്നണി സംവിധാനത്തിലൂടെ എൻഡിഎയ്ക്ക് ഭരിക്കാമെങ്കിലും ഇന്ത്യ മുന്നണിയും ഭരണത്തിന് വേണ്ടിയുള്ള നീക്കങ്ങൾ ശക്തമാക്കിയിരിക്കുകയാണ്.

വിജയിച്ച സ്ഥാനാർഥികളിൽ നിരവധി സിനിമാ - സീരിയൽ താരങ്ങളുണ്ടെന്നത് ഈ പ്രാവശ്യത്തെ പ്രത്യേകതയാണ്. കേരളത്തിൽ ആദ്യമായി അക്കൗണ്ട് തുറന്ന ബിജെപി സ്ഥാനാർഥി സുരേഷ് ഗോപി മുതൽ ഹിമാചലിലെ മാണ്ഡിയിൽ നിന്ന് വിജയിച്ച കങ്കണ റണാവത്ത് വരെ ഈ ലിസ്റ്റിലുണ്ട്. 18-ാം ലോക്‌സഭയിലേക്ക് എത്തുന്ന അഭിനേതാക്കളിൽ ചിലർ ആരൊക്കെയാണെന്ന് നോക്കാം.

സുരേഷ് ഗോപി
ബിജെപിയുടെ കേരളത്തിലെ സ്ഥാനാർഥികളിൽ ഒരാളായ സുരേഷ് ഗോപിക്ക് വലിയ വിജയമാണ് തൃശൂർ ലോക്‌സഭ മണ്ഡലത്തിൽ നിന്നും നേടാനായത്. 74686 വോട്ടുകൾ നേടിയാണ് സുരേഷ് ഗോപി മണ്ഡലത്തിൽ വിജയിച്ചത്.

പവൻ കല്യാൺ
തെലുങ്ക് സൂപ്പർസ്റ്റാറായ പവൻ കല്യാൺ ജനസേന പാർട്ടിയുടെ സ്ഥാപകനും നേതാവുമാണ്. ആന്ധ്രപ്രദേശിലെ പിതപുരത്ത് വൈഎസ്ആർസിപിയുടെ വംഗഗീത വിശ്വനാഥത്തെ പരാജയപ്പെടുത്തിയാണ് പവൻ കല്യാൺ  ലോക്‌സഭയിലേക്കെത്തുന്നത്.

അരുൺ ഗോവിൽ
 രാമായണം സീരിയലിൽ ശ്രീരാമനായി അഭിനയിച്ച അരുൺ ഗോവിലും വിജയിച്ച സ്ഥാനാർഥികളുടെ പട്ടികയിൽ ഇടംപിടിച്ചിട്ടുണ്ട്. ഉത്തർപ്രദേശിലെ മീററ്റിലാണ് അരുൺ ഗോവിൽ മത്സരിച്ചിരുന്നത്. 

ഹേമമാലിനി
ബിജെപി സ്ഥാനാർഥിയായ ഹേമമാലിനി മഥുരയിലാണ് വിജയിച്ചത്. 53.3 ശതമാനം വോട്ട് നേടിയാണ് ഹേമമാലിനി വിജയിച്ച് കയറിയത്. കോൺഗ്രസിന്റെ മുകേഷ് ധനഗർ ആയിരുന്നു എതിർസ്ഥാനാർഥി.

കങ്കണ റണാവത്ത്
ബോളിവുഡ് താരവും ബിജെപി നേതാവുമായ കങ്കണ ഹിമാചൽ പ്രദേശിലെ മാണ്ഡിയിൽ നിന്നാണ് മത്സരിച്ചിരുന്നത്. കോൺഗ്രസ് സ്ഥാനാർഥി വിക്രമാദിത്യ സിങ്ങിനെയാണ് കങ്കണ തോൽപ്പിച്ചത്.

മനോജ് തിവാരി
ബീഹാറിൽ നിന്നുള്ള ഒരു പിന്നണി ഗായകനും, അഭിനേതാവും സംവിധായകനുമാണ് മനോജ് തിവാരി. ഭോജ്പുരി സിനിമയെ പുനരുദ്ധരിച്ചയാൾ എന്ന നിലയിലാണ് അദ്ദേഹം കൂടുതലായും ശ്രദ്ധയമായത്. മനോജ് തിവാരി ബിജെപി സ്ഥാനാർഥിയായിട്ടാണ് മത്സരിച്ചത്. നോർത്ത് ഈസ്റ്റ് ഡൽഹിയിൽ നിന്ന് മത്സരിച്ച മനോജ് തിവാരി കോൺഗ്രസ് സ്ഥാനാർഥി കനയ്യകുമാറിനെയാണ് പരാജയപ്പെടുത്തിയത്.

ശത്രുഘ്‌നൻ സിൻഹ
ബോളിവുഡ് നടനായ ശത്രുഘ്‌നൻ സിൻഹ  പശ്ചിമബംഗാളിൽ അസൻസോൾ ലോക്സഭാ മണ്ഡലത്തിൽ തൃണമൂൽ കോൺഗ്രസ് സ്ഥാനാർഥിയായിട്ടാണ് മത്സരിച്ചത്. 59,564 വോട്ടുകൾ നേടിയാണ് ശത്രുഘ്‌നൻ സിൻഹയുടെ വിജയം. മുൻ കേന്ദ്രമന്ത്രിയും ബിജെപി സ്ഥാനാർഥിയുമായ സുരേന്ദ്രജീത് സിംഗ് അലുവാലിയയിരുന്നു ശത്രുഘ്‌നൻ സിൻഹയുടെ പ്രധാന എതിരാളി.

സതാബ്ദി റോയ്
ബംഗാളി നടിയും മൂന്ന് തവണ തൃണമൂൽ എംപിയുമായ സതാബ്ദി റോയ് ബിർഭൂം മണ്ഡലത്തിൽ നിന്നാണ് വിജയിച്ചത്.

രവി കിഷൻ

രവി കിഷൻ എന്നറിയപ്പെടുന്ന രവീന്ദ്ര കിഷൻ ശുക്ല ഒരു ഇന്ത്യൻ നടനും രാഷ്ട്രീയക്കാരനും ചലച്ചിത്ര നിർമ്മാതാവും ടെലിവിഷൻ വ്യക്തിത്വവുമാണ്. രവികിഷൻ ബിജെപി സ്ഥാനാർഥിയായിട്ടായിരുന്നു മത്സരിച്ചത്. ഉത്തർപ്രദേശിലെ ഗോരഖ്പൂർ മണ്ഡലത്തിൽ നിന്ന് എസ്പിയുടെ കാജൽ നിഷാദിനെ ഒരു ലക്ഷത്തിലധികം വോട്ടുകൾക്ക് പരാജയപ്പെടുത്തിയാണ് രവി കിഷൻ വിജയിച്ചത്.

രചന ബാനർജി

 ഒഡിയ, ബംഗാളി, തെലുങ്ക് എന്നീ ഭാഷകളിലെ അഭിനേത്രിയാണ് രചന ബാനർജി.തൃണമൂൽ കോൺഗ്രസിന് വേണ്ടിയും ലോക്കറ്റ് ചാറ്റർജി ബിജെപിക്ക് വേണ്ടിയും മത്സരിച്ചു. കടുത്ത മത്സരത്തിന് ഒടുവിൽ രചന ബാനർജി 60,000 വോട്ടുകൾക്ക് വിജയിക്കുകയായിരുന്നു.

ദേവ് അധികാരി
ബംഗാളി നടനായ ദേവ് അധികാരി തൃണമൂൽ സ്ഥാനാർഥിയായി പശ്ചിമബംഗാളിലെ ഘട്ടൽ മണ്ഡലത്തിലായിരുന്നു മത്സരിച്ചത്. ബംഗാളി നടനായ ഹിരൺ ചാറ്റർജിയായിരുന്നു എതിർസ്ഥാനാർത്ഥിയെങ്കിലും 1,82,868 വോട്ടുകളുടെ ഭൂരിപക്ഷത്തിൽ ദേവ് അധികാരി വിജയിക്കുകയിരുന്നു.