എംപോക്സ് വ്യാപനം; കേന്ദ്ര മന്ത്രാലയത്തിൻ്റെ പുതിയ മാർഗ്ഗ നിർദേശം

ലോകാരോഗ്യ സംഘടന (ഡബ്ല്യുഎച്ച്ഒ) പൊതുജനാരോഗ്യ അടിയന്തരാവസ്ഥയായി പ്രഖ്യാപിച്ചിരിക്കുന്ന എംപോക്സ് കേസുകൾ ട്രാക്കുചെയ്യുന്നതിനും നിരീക്ഷിക്കുന്നതിനുമുള്ള വിഷയത്തിൽ കേന്ദ്ര സർക്കാർ തിങ്കളാഴ്ച സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും ഒരു പുതിയ മാർഗ നിർദേശം നൽകി.നിലവിലെ വ്യാപനത്തിൻ്റെ പശ്ചാത്തലത്തിൽ ഇന്ത്യയിൽ എംപോക്സ് കേസുകളൊന്നും റിപ്പോർട്ട് ചെയ്തിട്ടില്ലെന്ന് കേന്ദ്ര ആരോഗ്യ മന്ത്രാലയം നിർദേശത്തിൽ പറയുന്നു. എന്നിരുന്നാലും, സംസ്ഥാന സർക്കാരുകൾ ജാഗ്രത പാലിക്കാനും നിരീക്ഷണം, ഐസൊലേഷൻ സൗകര്യങ്ങൾ എന്നിവയെക്കുറിച്ചുള്ള മന്ത്രാലയത്തിൻ്റെ വിവിധ മാർഗ്ഗനിർദ്ദേശങ്ങൾ പാലിക്കാനും നിർദ്ദേശിക്കപ്പെട്ടിട്ടുണ്ട്.

ദേശീയ സംയോജിത രോഗ നിരീക്ഷണ പരിപാടി (ഐഡിഎസ്പി) രാജ്യത്തെ ഏതെങ്കിലും എംപോക്സ് ക്ലസ്റ്ററുകൾ തിരിച്ചറിയാൻ സജീവമായി നിരീക്ഷിക്കുന്നുണ്ടെന്ന് മന്ത്രാലയം ചൂണ്ടിക്കാട്ടി. വിമാനത്താവളങ്ങൾ പോലുള്ള പ്രവേശന സ്ഥലങ്ങളിൽ വിദേശത്ത് നിന്നും വരുന്ന യാത്രക്കാരുടെ ആരോഗ്യ പരിശോധന തീവ്രമാക്കിയിട്ടുണ്ടെന്നും സംശയാസ്പദമായ കേസുകളിൽ നിന്നുള്ള സാമ്പിളുകൾ പരിശോധിക്കുന്നതിന് ഇന്ത്യൻ കൗൺസിൽ ഓഫ് മെഡിക്കൽ റിസർച്ചിന് (ഐസിഎംആർ) കീഴിലുള്ള ലബോറട്ടറി ശൃംഖല ശക്തിപ്പെടുത്തിയിട്ടുണ്ടെന്നും മന്ത്രാലയം അറിയിച്ചു.