/kalakaumudi/media/agency_attachments/zz0aZgq8g5bK7UEc9Bb2.png)
/kalakaumudi/media/media_files/JSxj3Dr1XRFDXmEg52Gp.JPG)
ചികിത്സ തേടിയെത്തിയ 26 വയസുകാരിയെ മയക്കുന്നതിനുള്ള മരുന്ന് കുത്തിവച്ച് മയക്കിയശേഷം പീഡിപ്പിച്ച സംഭവത്തില്‍ ഡോക്ടറെ പോലീസ് അറസ്റ്റ് ചെയ്തു. ബംഗാളിലെ നോര്‍ത്ത് 24 പര്‍ഗാനാസ് ജില്ലയിലെ ഹസ്‌നബാദ് എന്ന സ്ഥലത്താണ് സംഭവം. മയക്കുന്നതിനുള്ള മരുന്ന് യുവതിയുടെ ശരീരത്തില്‍ കുത്തിവെച്ചെന്നും ബോധരഹിതയായപ്പോള്‍ പീഡിപ്പിച്ചെന്നുമാണ് പരാതി. നൂര്‍ ആലം സര്‍ദാര്‍ എന്ന ഡോക്ടറെ പോലീസ് അറസ്റ്റ് ചെയ്തു.
പീഡന ദൃശ്യങ്ങള്‍ ഇയാള്‍ വീഡിയോയില്‍ പകര്‍ത്തിയിരുന്നു. ഈ വീഡിയോ സോഷ്യല്‍ മീഡിയ വഴി പ്രചരിപ്പിക്കുമെന്നു ഭീഷണിപ്പെടുത്തി നാല് ലക്ഷം രൂപ വാങ്ങിയെന്നും ബ്ലാക് മെയില്‍ ചെയ്ത് വീണ്ടും പലതവണ പീഡിപ്പിച്ചെന്നും പരാതിയില്‍ പറയുന്നു. യുവതിയും ഭര്‍ത്താവും ഹസ്‌നബാദ് പോലീസ് സ്‌റ്റേഷനില്‍ എത്തി പരാതി നല്‍കിയതോടെയാണ് സംഭവം പുറത്തറിഞ്ഞത്. ബിഹാറില്‍ ജോലി ചെയ്യുന്ന ഭര്‍ത്താവ് നാട്ടില്‍ ഇല്ലാതിരുന്ന സമയത്താണ് യുവതി തനിച്ച് ഡോക്ടറുടെ അടുത്ത് ചികിത്സ തേടിയെത്തിയത്.
പരാതി കിട്ടിയതിനു പിന്നാലെ പോലീസ് ക്ലിനിക്കിലെത്തി ഡോക്ടറെ അറസ്റ്റ് ചെയ്തു. ഇയാളുടെ താമസ സ്ഥലത്തോട് ചേര്‍ന്നു തന്നെയാണ് ക്ലിനിക്കും പ്രവര്‍ത്തിക്കുന്നത്. ഇയാള്‍ രജിസ്‌ട്രേഡ് ഡോക്ടര്‍ തന്നെയാണെന്ന് പോലീസ് സ്ഥിരീകരിച്ചിട്ടുണ്ട്. സ്ത്രീയുടെ രഹസ്യ മൊഴി രേഖപ്പെടുത്തിയെന്നും പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്‌തെന്നും ബഹിര്‍ഹത് എസ്.പി ഹൊസെയ്ന്‍ മെഹ്ദി റഹ്മാന്‍ പറഞ്ഞു.