വീടിനുള്ളില്‍ വെടിയുണ്ട; ഞെട്ടലൊഴിയുംമുന്നെ മറ്റൊരു വെടിയുണ്ട കൂടി

തിരുവനന്തപുരം: വിളവൂര്‍ക്കലില്‍ വീടിന്റെ മേല്‍ക്കൂര തുളച്ചെത്തിയ വെടിയുണ്ട ഹാളിലെ സോഫയില്‍ കണ്ടെത്തിയതിന്റെ ഞെട്ടലില്‍നിന്നും നാട്ടുകാര്‍ മുക്തരാകുന്നതിന് മുന്നെ പ്രദേശത്തുനിന്നും വീണ്ടും മറ്റൊരു വെടിയുണ്ട കൂടി കണ്ടെത്തി. കഴിഞ്ഞ ദിവസം വെടിയുണ്ട പതിച്ച വീടിന് 100 മീറ്റര്‍ അകലെയാണ് ഇപ്പോള്‍ വെടിയുണ്ട കണ്ടെത്തിയിരിക്കുന്നത്. മലയിന്‍കീഴ് സി. ഐ യുടെ നേതൃത്വത്തിലുള്ള സംഘം സ്ഥലത്തെത്തി വെടിയുണ്ട കൊണ്ടുപോയി. കുറക്കോണം സി.എസ്.ഐ പള്ളിക്ക് സമീപമാണ് രണ്ടാമത്തെ വെടിയുണ്ട കണ്ടെത്തിയത്.

തുടര്‍ച്ചയായി വെടിയുണ്ട കണ്ടെത്തുന്ന സംഭവം പ്രദേശവാസികളെയാകെ ആശങ്കയിലാക്കിയിരിക്കുകയാണ്. ഇതിന് മുന്‍പ് പലതവണ ഈ പ്രദേശത്തുനിന്നും  ഇത്തരത്തിൽ വെടിയുണ്ട കണ്ടെത്തിയിട്ടുണ്ടെന്നും കുട്ടികളുള്‍പ്പടെ ഭയത്തോടെയാണ് കഴിയുന്നതെന്നും നാട്ടുകാര്‍ പറയുന്നു.

 ഈ പ്രദേശങ്ങളിൽ മുൻപും സമാന രീതിയിൽ വെടിയുണ്ടകൾ കണ്ടെത്തിയിട്ടുണ്ട്. മലയിൻകീഴ് മൂക്കുന്നിമല ഫയറിങ് സ്റ്റേഷനിൽനിന്ന് ലക്ഷ്യം തെറ്റിയ വെടിയുണ്ടകൾ മുൻപും പലതവണ ജനവാസ മേഖലകളിൽ പതിച്ചിട്ടുണ്ട്.