രത്തൻ ടാറ്റയുടെ അഭാവം അവിശ്വസനീയം, ഇതിഹാസങ്ങൾക്ക് മരണമില്ല: ആനന്ദ് മഹീന്ദ്ര

ന്യൂഡൽഹി: വ്യവസായ പ്രമുഖനും ടാറ്റ ഗ്രൂപ്പ് മുൻ ചെയർമാനുമായ രത്തൻ ടാറ്റയുടെ മരണത്തിൽ അനുശോചനം രേഖപ്പെടുത്തി മഹീന്ദ്ര ഗ്രൂപ്പ് ചെയർമാൻ ആനന്ദ് മഹീന്ദ്ര. രത്തൻ ടാറ്റയുടെ അഭാവം അവിശ്വസനീയമാണ്. ഇന്ത്യൻ സമ്പദ് വ്യവസ്ഥ ചരിത്രപരമായ വളർച്ചയിൽ എത്തി നിൽക്കുകയാണ്. അതിൽ രത്തൻ ടാറ്റ നിർണായക പങ്കാണ് വഹിച്ചതെന്നും ആനന്ദ് മഹീന്ദ്ര പറഞ്ഞു. ഇതിഹാസങ്ങൾക്ക് മരണമില്ലെന്നും ആനന്ദ് മഹീന്ദ്ര കൂട്ടിച്ചേർത്തു. എക്സിലൂടെയായിരുന്നു ആനന്ദ് മഹീന്ദ്ര അനുശോചനം അറിയിച്ചത്.

വ്യവസായ രംഗത്ത് വിപ്ലവം സൃഷ്ടിച്ച രത്തൻ ടാറ്റയുടെ മരണം ബുധനാഴ്ച രാത്രിയോടെയായിരുന്നു സ്ഥിരീകരിച്ചത്. മുംബൈയിലെ സ്വകാര്യ ആശുപത്രിയിൽ ചികിത്സയിലിരിക്കെയായിരുന്നു അന്ത്യം. അതീവ ഗുരുതരാവസ്ഥയിൽ നാല് ദിവസമായി ചികിത്സയിലായിരുന്നു. കഴിഞ്ഞ ദിവസം ആരോഗ്യനില ഭേദമാണെന്ന് അദ്ദേഹം സോഷ്യൽ മീഡിയയിലൂടെ അറിയിച്ചിരുന്നു. എന്നാൽ വീണ്ടും ആരോഗ്യനില വഷളാകുകയായിരുന്നു. കഴിഞ്ഞ മൂന്ന് ദിവസമായി വെന്റിലേറ്ററിന്റെ സഹായത്തോടെയായിരുന്നു രത്തൻ ടാറ്റ കഴിഞ്ഞിരുന്നത്.