കേരളത്തിന്റെ അഭിമാനമായി മീരാ മഹോത്സവത്തിൽ ശരണ്യ സഹസ്രയുടെ കഥക്

തൃശൂർ: രാജസ്ഥാനിലെ മെർട്ടയിൽ നടന്ന മീരാ മഹോത്സവത്തിൽ താരമായി കേരളത്തിന്റെ കഥക് നർത്തകി ശരണ്യ സഹസ്ര.ഒക്ടോബർ മൂന്നിനായിരുന്നു മീരാ മഹോത്സവം അരങ്ങേറിയത്. കേന്ദ്ര സംഗീതനാടക അക്കാദമിയുടെയും കേന്ദ്ര സർക്കാരിന്റെ സാംസ്‌കാരിക മന്ത്രാലയത്തിന്റെയും ക്ഷണം സ്വീകരിച്ചാണ് ശരണ്യ തന്റെ സംഘവുമായി മീരാ മഹോത്സവത്തിനെത്തിയത്. സംഗീതനാടക അക്കാദമിയുടെ ക്ഷണം ലഭിച്ച കേരളത്തിലെ ഏക കഥക് സംഘമായിരുന്നു ശരണ്യയുടെ സഹസ്ര കഥക് സംഘം. 

ഭക്തിയുടെയും പ്രണയത്തിന്റെയും മറുപേരാണ് മീരാ ബായി. അവരുടെ ആന്തരികലോകത്തേക്ക് കടന്നു ചെല്ലുന്ന, പ്രണയത്തിന്റെയും ഭക്തിയുടെയും പരിവർത്തനാത്മകമായ അവളുടെ യാത്രയെ പര്യവേക്ഷണം ചെയ്യുന്ന ഒരു കഥക് നൃത്തശില്പമാണ് സംഘം മീരാ മഹോത്സവത്തിൽ അവതരിപ്പിച്ചത്. ശരണ്യ സംവിധാനം ചെയ്ത 'പ്രേം രംഗ് മീരാ' അരങ്ങിലെത്തിയപ്പോൾ പ്രേക്ഷകർ പ്രണയത്തിന്റെയും ഭക്തിയുടെയും അനുഭൂതി എന്തെന്നറിഞ്ഞതുപോലെയായിരുന്നു പ്രതികരണം. പ്രേക്ഷകരും നിരൂപകരും ഒരുപോലെ നൃത്താവിഷ്‌കാരം സ്വീകരിച്ചു. അവതരണത്തിലെ സാങ്കേതിക മികവ്, വൈകാരിക ആഴം, സൂക്ഷ്മമായ കഥപറച്ചിൽ എന്നിവയാണ് അവരെ ആകർഷിച്ചത്. 

മീരാ മഹോത്സവത്തിൽ തങ്ങളുടെ 'പ്രേം രംഗ് മീരാ' അവതരിപ്പിക്കാൻ ക്ഷണിച്ചതിൽ അഭിമാനമുണ്ടെന്ന് ആർടിസ്റ്റിക് ഡയറക്ടർ ശരണ്യ സഹസ്ര പറഞ്ഞു. 'മീരാ ബായിയുടെ കാലാതീതമായ ചൈതന്യത്തിനും കൃഷ്ണനോടുള്ള അവളുടെ അചഞ്ചലമായ സമർപ്പണത്തിനുമുള്ള തങ്ങളുടെ ആദരവാണ് ഈ നൃത്തശില്പമെന്നും അവർ പറഞ്ഞു.

ഇന്ത്യയുടെ സമ്പന്നമായ സാംസ്‌കാരിക പൈതൃകം സംരക്ഷിക്കുന്നതിനും പ്രോത്സാഹിപ്പിക്കുന്നതിനുമായി സമർപ്പിച്ചിരിക്കുന്ന, കേരളം ആസ്ഥാനമായുള്ള ഒരു പ്രശസ്ത കഥക് നൃത്ത സ്ഥാപനമാണ് ശരണ്യയുടെ സഹസ്ര കഥക് റെപ്പർട്ടറി. കേരളത്തിലെ ഒരു പയനിയറിംഗ് കഥക് ടീം എന്ന നിലയിൽ കലാപരമായ ആവിഷ്‌കാരത്തിന്റെ അതിരുകൾ തുടർച്ചയായി വികസിതമാക്കി മുന്നേറുന്ന സഹസ്ര ഇതിനകം  നിരവധി അംഗീകാരവും നേടിയിട്ടുണ്ട്.