ആകെ വിറ്റത് 2 ടിക്കറ്റ്!  എന്തിനായിരുന്നു പാലേരിമാണിക്യം റീറിലിസെന്ന് ആരാധകർ

മമ്മൂട്ടി നായകനായ ‘പാലേരി മാണിക്യം ഒരു പാതിര കൊലപാതകത്തിന്റെ കഥ’ കാണാൻ ആളില്ല. ചിത്രത്തിന്റെ ഒറ്റ ടിക്കറ്റ് പോലും വിറ്റുപോകാതായതോടെ പലയിടത്തും ഷോ മുടങ്ങി. തിരുവനന്തപുരം ഏരീസ്പ്ലസ് അടക്കമുള്ള തിയേറ്ററുകൾ  ഷോ ഒഴിവാക്കി. നാല് തിയറ്ററിലും കൂടി ആകെ രണ്ട് ടിക്കറ്റാണ് മുൻകൂട്ടി ബുക്ക് ചെയ്തിരിക്കുന്നത്.

വെള്ളിയാഴ്ചയാണ് സിനിമ റീറിലീസ് ചെയ്തത്. കാര്യമായ റിലീസ് ഇല്ലാത്ത ദിവസം ആയിട്ട് കൂടി മമ്മൂട്ടി- രഞ്ജിത് പടം കാണാൻ ആളുണ്ടായില്ല. ആദ്യമായാണ് ഒരു മമ്മൂട്ടി ചിത്രം റിറിലീസ് ചെയ്തത്. എന്തിനായിരുന്നു ഈ ചിത്രത്തിന്റെ റീറിലീസ് എന്ന ചോദ്യം സോഷ്യൽ മീഡിയയിൽ വ്യാപകമാണ്. കഴിഞ്ഞ മാസമാണ് രഞ്ജിത്ത് സംവിധാനം ചെയ്ത ‘പാലേരിമാണിക്യം ഒരു പാതിരകൊലപാതകത്തിന്റെ കഥ’ റീറിലീസ് ചെയ്യുന്നതായി വാർത്തകൾ പുറത്തുവന്നത്.

അടുത്തിടെ മോഹൻലാൽ നായകനായ മണിചിത്രത്താഴും ദേവദൂതനും റിറിലീസ് ചെയ്തിരുന്നു. രണ്ട് ചിത്രങ്ങൾക്കും മികച്ച പ്രേക്ഷക പിന്തുണയാണ് ലഭിച്ചത്. സംവിധായകൻ രഞ്ജിത്തിനെതിരെ ലൈം​ഗികാരോപണം സിനിമയ്‌ക്ക് തിരിച്ചടിയായോ എന്ന് സംശയമുണ്ട്. പാലേരി മാണിക്യത്തിൽ ഒഡീഷനിടെ രഞ്ജിത്ത് അപമര്യാദയായി പെരുമാറി എന്നാണ് ബം​ഗാളി നടി ആരോപിച്ചത്.