നയൻതാര: ബിയോണ്ട് ദി ഫെയറി ടെയ്ൽ’ നെറ്റ്ഫ്ലിക്സിൽ ഉടൻ

തെന്നിന്ത്യൻ ലേഡി സൂപ്പർ സ്റ്റാർ നയൻതാരയുടെ പിറന്നാൾ ദിനത്തിൽ 'നയൻതാര: ബിയോണ്ട് ദി ഫെയറി ടെയ്ൽ’ എന്ന ഡോക്യുമെൻററി സ്ട്രീം ചെയ്യാനൊരുങ്ങി നെറ്റ്ഫ്ലിക്സ്. സിനിമയിലെ താരമെന്നതിനപ്പുറം മകൾ, സഹോദരി, ജീവിതപങ്കാളി, മാതാവ്, സുഹൃത്ത് എന്നിങ്ങനെ നയൻതാരയുടെ ജീവിതത്തിലെ റോളുകളും ഇതിലൂടെ പ്രേക്ഷകർക്ക് അടുത്തറിയാം. ഈ മാസം പതിനെട്ടിനാണ് നയൻതാരയുടെ പിറന്നാൾ.

ഒരു മണിക്കൂർ 21 മിനിട്ടാണ് ഡോക്യൂമെന്ററിയുടെ ദൈർഘ്യം. ഗൗതം വാസുദേവ് ​​മേനോനാണ് ഡോക്യുമെൻററി സംവിധാനം ചെയ്തിരിക്കുന്നത്. 2022 ജൂണിലാണ് മഹാബലിപുരത്തെ ഷെറാട്ടൺ ഗ്രാൻഡ് റിസോർട്ടിൽ വെച്ച് നയൻതാര- വിഘ്‌നേഷ് വിവാഹം നടന്നത്. വിവാഹത്തിന്റെ സ്ട്രീമിങ് അവകാശത്തിനു വേണ്ടി 25 കോടിയാണ് പ്രതിഫലമായി നയൻതാരയ്ക്കും വിഘ്‌നേശിനും നെറ്റ്ഫ്‌ലിക്‌സ് നൽകിയത്.

വിവാഹം നടന്നതിന് തൊട്ടടുത്ത ദിവസങ്ങളിലായി ഡോക്യുമെൻററിയുടെ ഒരു ടീസർ നെറ്റ്ഫ്ളിക്സ് പുറത്തുവിട്ടിരുന്നു. തമ്മിൽ കണ്ടുമുട്ടിയതിനെ കുറിച്ചും, പ്രണയത്തെപ്പറ്റിയുമെല്ലാം താരജോഡികൾ ഈ ടീസറിൽ സംസാരിച്ചിരുന്നു. അന്ന് മുതൽ വീഡിയോയ്ക്കായി ആകാംക്ഷാപൂർവം ആരാധകർ കാത്തിരിക്കുകയാണ്.

രജനികാന്ത്, ഷാരൂഖ് ഖാൻ, ബോണി കപൂർ, മണിരത്‍നം, ആര്യ, സൂര്യ, അറ്റ്‍ലി, എ ആർ റഹ്‍മാൻ തുടങ്ങി ഇന്ത്യയിലെ വിവിധ സിനിമാ ഇൻഡസ്ട്രികളിലെ പ്രമുഖർ നയൻതാര-വിഘ്നേശ് വിവാഹചടങ്ങുകളിൽ പങ്കെടുത്തിരുന്നു.