'ഈ പുരസ്കാരം എന്റെ നാടിന്': വയനാടിനെ പരാമർശിച്ച് ഫിലിം ഫെയർ വേദിയിൽ ജൂഡ് ആന്തണി

വയനാട്ടിലെ ദുരന്തത്തെ പരാമർശിച്ച് ഫിലിം ഫെയർ വേദിയിൽ സംവിധായകൻ ജൂഡ് ആന്തണി ജോസഫ്. മികച്ച ചിത്രത്തിനുള്ള പുരസ്കാരം ഏറ്റുവാങ്ങിക്കൊണ്ടു സംസാരിക്കുമ്പോഴായിരുന്നു ജൂഡിന്റെ വയനാട് പരാമർശം. ജൂഡ് സംവിധാനം ചെയ്ത 2018–എവരിവൺ ഈസ് എ ഹീറോ എന്ന ചിത്രത്തിനാണ് മികച്ച മലയാള സിനിമയ്ക്കുള്ള ഫിലിം ഫെയർ പുരസ്കാരം ലഭിച്ചത്. 

പുരസ്കാരം കേരളത്തിന് സമർപ്പിച്ചുകൊണ്ട് ജൂഡ് നടത്തിയ പ്രസംഗം സമൂഹമാധ്യമങ്ങൾ ഏറ്റെടുത്തിരിക്കുകയാണ് . 2018 കേരളത്തിൽ ഉണ്ടായ പ്രളയത്തെക്കുറിച്ച് പറയുന്ന സിനിമയാണ്. വീണ്ടുമൊരു പ്രകൃതിദുരന്തത്തെ കേരളം നേരിടുന്ന വേളയിലാണ് ഈ പുരസ്കാര പ്രഖ്യാപനം ഉണ്ടാകുന്നതെന്ന് ജൂഡ് പറഞ്ഞു.

" ഹൈദരാബാദിൽ വച്ച് ഈ പുരസ്കാരം നേടിയതിലും വലിയ സന്തോഷമുണ്ട്. കാരണം എന്റെ സിനിമ 2018ന്റെ പല ഭാ​ഗങ്ങളും ഹൈദരാബാദിൽ വച്ചാണ് ഷൂട്ട് ചെയ്തത്. ഈ സിനിമ എല്ലാവർക്കും ഒരുപോലെ ഇഷ്ടപ്പെട്ടതിൽ എനിക്ക് ഒരുപാട് സന്തോഷമുണ്ട്. നിങ്ങൾക്ക് എല്ലാവർക്കും അറിയാം 2018, എവരിവൺ ഈസ് എ ഹീറോ എന്ന ഈ സിനിമ കേരളത്തിൽ ഉണ്ടായ പ്രളയത്തെ ആസ്പദമാക്കി എടുത്തതാണ് എന്ന്."

"ഞാനും ആ സിനിമയിൽ അഭിനയിച്ച പല താരങ്ങളും 2018ലെ ആ പ്രളയത്തെ അതിജീവിച്ചവരാണ്. അതിനാൽ തന്നെ ഈ ഒരു വിഷയത്തെ സംബന്ധിച്ച് ഞങ്ങൾക്ക് ഒരു സിനിമ ചെയ്യണമെന്നും പ്രേക്ഷകരിലേക്ക് പ്രചോദനാത്മകമായ സന്ദേശം എത്തിക്കണമെന്നും ഞങ്ങൾ അതിയായി ആ​ഗ്രഹിച്ചു. ദൗർഭാഗ്യവശാൽ, വീണ്ടും അത്തരമൊരു ദുരന്തത്തെ നേരിടുകയാണ് കേരളം. വയനാട്ടിൽ സംഭവിച്ച പ്രകൃതിദുരന്തത്തെക്കുറിച്ച് നിങ്ങൾ അറിഞ്ഞുകാണുമെന്ന് കരുതുന്നു.

"അതിനാൽ എനിക്ക് ഒരു അപേക്ഷ മാത്രമേ ഉള്ളൂ വയനാട്ടിലെ ജനങ്ങളെ സഹായിക്കുക, അവരെ പിന്തുണയ്ക്കുക. പണം മാത്രമല്ല പ്രധാനം. ഈ പുരസ്കാരം ഞാനെന്റെ നാടിന് സമർപ്പിക്കുന്നു," ജൂഡ് പറഞ്ഞു.