'പ്രിയപ്പെട്ടവരേ, ഏറെ പ്രത്യേകതയുള്ള ഒരാൾ ജീവിതത്തിലേക്ക് കടന്നുവരുന്നു,കാത്തിരിക്കൂ..'; ചർച്ചയായി പ്രഭാസിന്റെ ഇൻസ്റ്റാ​ഗ്രാം സ്റ്റോറി

നിരവധി ആരാധകരുള്ള താരമാണ് പ്രഭാസ്. എസ്.എസ്. രാജമൗലി സംവിധാനം ചെയ്ത 'ബാഹുബലി'യാണ് പ്രഭാസിന്റെ  അഭിനയ ജീവിതം മാറ്റിമറിച്ചത്. 'ബാഹുബലി' ആദ്യഭാഗം പുറത്തിറങ്ങിയതിന് ശേഷം പ്രഭാസിന് നിരവധി വിവാഹാലോചനകൾ വന്നതായാണ് റിപ്പോർട്ടുകൾ പറയുന്നത്.അതിനിടെ പ്രഭാസും സഹതാരം അനുഷ്‌ക ഷെട്ടിയും പ്രണയത്തിലാണെന്ന വാർത്തയും ഏറെ ചർച്ചയായിരുന്നു.

ഇപ്പോഴിതാ ഇന്ന് രാവിലെ താരം തൻ്റെ ഇൻസ്റ്റാഗ്രാമിൽ പങ്കുവച്ച ഒരു സ്റ്റോറിയാണ് ആരാധകർക്കിടയിൽ ചർച്ചയാകുന്നത്.പ്രിയപ്പെട്ടവരേ, എനിക്ക് ഏറെ പ്രത്യേകതയുള്ള ഒരാൾ ജീവിതത്തിലേക്ക് കടന്നുവരുന്നുവരാൻ ഒരുങ്ങുന്നു. കാത്തിരിക്കൂ- പ്രഭാസ് കുറിച്ചത്.പ്രഭാസ് വിവാഹിതനാകാൻ ഒരുങ്ങുന്നുവെന്നാണ് ഇപ്പോൾ പുറത്തു വരുന്ന റിപ്പോർട്ടുകൾ. നടന്റെ ഫാൻ പേജുകളിലും ഇത് വ്യാപകമായി പ്രചരിക്കുകയാണ്. എന്നാൽ ഇത് ഒരു 'പ്രാങ്കാ'യിരിക്കാമെന്നും പുതിയ സിനിമയുടെ പ്രമോഷനാണെന്നും അഭിപ്രായമുയരുന്നുണ്ട്. എന്തായാലും അടുത്ത അപ്‌ഡേറ്റിനുള്ള കാത്തിരിപ്പിലാണ്  ആരാധകർ.

അതെസമയം 'കൽകി 2898 എഡി'യാണ് പ്രഭാസിന്റെ പുതിയ ചിത്രം. നാഗ് അശ്വിൻ സംവിധാനം ചെയ്യുന്ന 'കൽകി 2898 എഡി' ജൂൺ 27-നാണ് ചിത്രം തീയറ്ററുകളിൽ എത്തുന്നത്. പ്രഭാസിനെക്കൂടാതെ അമിതാഭ് ബച്ചൻ, കമൽഹാസൻ, ദീപിക പദുക്കോൺ, ജൂനിയർ എൻടിആർ, വിജയ് ദേവരക്കൊണ്ട, ദുൽഖർ സൽമാൻ തുടങ്ങിയവരും പ്രധാന വേഷങ്ങളിലെത്തുന്ന ഈ സയൻസ് ഫിക്ഷൻ ഫാന്റസി ചിത്രം നാഗ് അശ്വിനാണ് സംവിധാനം ചെയ്യുന്നത്.

വൈജയന്തി മൂവീസിന്റെ ബാനറിൽ സി അശ്വിനി ദത്താണ് 'കൽക്കി 2898 എഡി' നിർമ്മിക്കുന്നത്. പുരാണങ്ങളിൽ നിന്ന് പ്രചോദനം ഉൾക്കൊണ്ട് ഭാവിയെ തുറന്നുകാണിക്കുന്ന ഒരു സയൻസ് ഫിക്ഷനാണ് 'കൽക്കി 2898 എഡി' എന്നാണ് റിപ്പോർട്ട്.തമിഴകത്തെ നിരവധി ഹിറ്റ് ഗാനങ്ങൾക്ക് സംഗീതം നൽകിയ സന്തോഷ് നാരായണനാണ് 'കൽക്കി 2898 എഡി'യുടെ പാട്ടുകൾ ഒരുക്കുക. സാൻ ഡീഗോ കോമിക്-കോണിൽ കഴിഞ്ഞ വർഷം നടന്ന തകർപ്പൻ അരങ്ങേറ്റത്തിന് ശേഷം ആഗോളതലത്തിൽ ശ്രദ്ധയാകർഷിച്ച ഈ ചിത്രം വൻ പ്രതീക്ഷയോടെയാണ് പ്രേക്ഷകർ നോക്കികാണുന്നത്.