ഷാറൂഖ് ഖാനും മകൾ സുഹാനയ്ക്കും വില്ലനായി അഭിഷേക് ബച്ചൻ; ചിത്രം 'കിങ്' അപ്ഡേറ്റ്

ഷാറൂഖ് ഖാനും മകൾ സുഹാന ഖാനും ആദ്യമായി ഒരുമിച്ച് അഭിനയിക്കുന്ന ചിത്രമാണ് കിങ്.ചിത്രത്തിൽ അച്ഛനും മകൾക്കും വില്ലനായി എത്തുന്നത് നടൻ അഭിഷേക് ബച്ചനെന്നാണ് ഇപ്പോൾ പുറത്തുവരുന്ന റിപ്പോർട്ട്. 'രാവൺ', 'ഗുരു' എന്നീ ചിത്രങ്ങളിൽ നെഗറ്റീവ് സ്വഭാവമുള്ള കഥാപാത്രങ്ങളെ അവതരിപ്പിച്ചിട്ടുണ്ടെങ്കിലും ഇതാദ്യമായിട്ടാണ് പൂർണ്ണ വില്ലനായി അഭിഷേക് എത്തുന്നത്.അതെസമയം വാർത്ത ശരിവെച്ച് അമിതാഭ് ബച്ചൻ രം​ഗത്തെത്തിയിട്ടുണ്ട്.മകന് ആശംസ നേർന്നുകൊണ്ടാണ് താരം ഇക്കാര്യം സ്ഥിരീകരിച്ചിരിക്കുന്നത്. ഇതാണ് സമയമെന്നും ബച്ചൻ കുറിച്ചു.ഘൂമർ ആണ് അഭിഷേക് ബച്ചന്റേതായി ഏറ്റവും ഒടുവിൽ പുറത്തിറങ്ങിയ ചിത്രം.

അഭിഷേക് ബച്ചന്റെ കരിയറിലെ നിർണ്ണായക കഥാപാത്രമായിരിക്കും കിങ്ങിലേതെന്നാണ്  റിപ്പോർട്ടുകൾ പറയുന്നത്.വ്യത്യസ്ത രീതിയിലാണ് സംവിധായകൻ ജൂനിയർ ബച്ചനെ അവതരിപ്പിക്കുന്നതെന്നാണ് അണിയറ പ്രവർത്തകരെ ഉദ്ധരിച്ച് പുറത്തുവരുന്ന വിവരം.സുജോയ് ഘോഷ് സംവിധാനം ചെയ്യുന്ന ചിത്രത്തിൻറെ പ്രൊഡക്ഷൻ ആക്ഷൻ മേൽനോട്ടം വഹിക്കുന്നത് സംവിധായകൻ സിദ്ധാർഥ് ആനന്ദാണ്. സൂപ്പർ ഹിറ്റ് ചിത്രമായ പത്താന് ശേഷം കിങ് ഖാനും സിദ്ധാർഥ് ആനന്ദും ഒന്നിക്കുന്നു എന്ന പ്രത്യേകതയും കിങ് എന്ന ചിത്രത്തിനുണ്ട്.

 കിങ് അടുത്ത വർഷം ഡിസംബറിലെത്തുമെന്നാണ് റിപ്പോർട്ട്. ഷാറൂഖ് ഖാൻറെ പ്രൊഡക്ഷൻ ഹൗസ് റെഡ് ചില്ലീസും, സിദ്ധാർഥ് ആനന്ദിൻറെ മാർഫ്ലിക്സും ചേർന്നാണ് ചിത്രം നിർമ്മിക്കുന്നത്. ഡങ്കിയാണ് ഏറ്റവും ഒടുവിൽ പുറത്തിറങ്ങിയ ഷാറൂഖ് ഖാൻ ചിത്രം.സുഹാന ഖാന്റെ രണ്ടാമത്തെ ചിത്രമാണിത്. സോയ അക്തറിൻറെ ദി ആർച്ചീസിലൂടെയായിരുന്നു താരപുത്രിയുടെ അരങ്ങേറ്റം.ഒ.ടി.ടിയിലാണ് ചിത്രം റിലീസ് ചെയ്തത്.