കളി മുറുകും; പാകിസ്താനെതിരെ ടോസ് നേടിയ ഇംഗ്ലണ്ട് ബാറ്റിങ് തിരഞ്ഞെടുത്തു

2023 ഏകദിന ലോകകപ്പിൽ പാകിസ്താനെതിരെ ടോസ് നേടിയ ഇംഗ്ലണ്ട് ബാറ്റിങ് തിരഞ്ഞെടുത്തു. ഉച്ചയ്ക്ക് 2 മണിക്ക് കൊൽക്കത്തയിലെ ഈഡൻ ഗാർ‍ഡൻസിലാണ് മത്സരം.

ഈഡൻ ഗാർ‍ഡൻസിൽ ക്രിക്കറ്റ് ചരിത്രത്തിൽ ഇത് വരെ നടന്നിട്ടില്ലാത്ത അത്ഭുതം സംഭവിച്ചാൽ ബാബറും കൂട്ടരും സെമിയിലെത്തു. മുൻ ചാമ്പ്യന്മാരായ ഇംഗ്ളണ്ട് ആദ്യം ബാറ്റ് ചെയ്യുകയാണെങ്കിൽ 287 റൺസിന് തോൽപ്പിക്കണം.

ഇനി ചേസിംഗ് എങ്കിൽ 283 പന്ത് ബാക്കിനിൽക്ക വിജയലക്ഷ്യം മറികടക്കണം. അതായത് പാകിസ്ഥാൻ 300 റൺസ് ഉയർത്തിയാൽ ഇംഗ്ലണ്ട് വെറും 13 റൺസിന് പുറത്താവണം.

ഇനി 400 റൺസെങ്കിൽ 112 റൺസേ ആകെ വഴങ്ങാവൂ. ഏകദിന ചരിത്രത്തിൽ പാകിസ്ഥാൻറെ ഉയർന്ന സ്കോർ 399 ആണ് എന്നതിനാൽ എല്ലാം വെറും സ്വപ്‌നമായി തീരാനാണ് കുടുതലും സാധ്യത.

ടൂർണമെൻറിൽ നിറംമങ്ങിയെങ്കിലും മൂന്നാം ജയത്തോടെ 2025ലെ ചാമ്പ്യൻസ് ട്രോഫി യോഗ്യത ഉറപ്പാക്കുകയാണ് ഇംഗ്ലണ്ടിൻറെ ലക്ഷ്യം. ലോകകപ്പിലെ നേർക്കുനേർ പോരിൽ ഇംഗ്ലണ്ടിനാണ് നേരിയ മുൻതൂക്കം. 10 മത്സരങ്ങളിൽ ഇംഗ്ലണ്ട് ജയിച്ചു. അവസാന ലോകകപ്പിലെ ഉൾപ്പടെ നാല് എണ്ണത്തിൽ പാകിസ്ഥാൻ ജയിച്ചപ്പോൾ ഒരു മത്സരം ഉപേക്ഷിച്ചു.

ഇംഗ്ലണ്ട് സ്ക്വാഡ്: ജോണി ബെയർസ്റ്റോ, ഡേവിഡ് മലൻ, ജോ റൂട്ട്, ബെൻ സ്റ്റോക്സ്, ഹാരി ബ്രൂക്ക്, ജോസ് ബട്ട്ലർ (ക്യാപ്റ്റൻ) (വിക്കറ്റ് കീപ്പർ), മൊയിൻ അലി, ക്രിസ് വോക്സ്, ഡേവിഡ് വില്ലി, ഗസ് അറ്റ്കിൻസൺ, ആദിൽ റഷീദ്

പാകിസ്ഥാൻ സ്ക്വാഡ്: അബ്ദുല്ല ഷഫീഖ്, ഫഖർ സമാൻ, ബാബർ അസം (ക്യാപ്റ്റൻ), മുഹമ്മദ് റിസ്വാൻ (വിക്കറ്റ് കീപ്പർ), സൗദ് ഷക്കീൽ, ഇഫ്തിഖർ അഹമ്മദ്, ആഘ സൽമാൻ, ഷദാബ് ഖാൻ, ഷഹീൻ അഫ്രീദി, മുഹമ്മദ് വസീം, ഹാരിസ് റൗഫ്