തിരിഞ്ഞു നോക്കാതെ ആരാധകർ; ഓസ്‌ട്രേലിയൻ ടീമിന് നിരാശ

കാൻബറ: ഏകദിന ലോകകപ്പ് വിജയിച്ച ശേഷം നായകൻ പാറ്റ് കമിൻസ് ഓസ്ട്രേലിയയിലേക്കു മടങ്ങിയെത്തി. ബുധനാഴ്ച രാവിലെയാണ് കമിൻസും ബാക്കി ടീം അംഗങ്ങളും നാട്ടില്‍ തിരിച്ചെത്തിയത്. പക്ഷേ താരങ്ങളെ സ്വീകരിക്കാൻ ആരാധകർ ആരും ഉണ്ടായിരുന്നില്ല.

ലോകകപ്പ് ജയിച്ചിട്ടും ഓസ്ട്രേലിയൻ ടീമിനെ കാണാന്‍ ആരാധകർ ആരും വിമാനത്താവളത്തിൽ എത്താതിരുന്നത് എന്താണെന്ന സംശയത്തിലാണ് ഇന്ത്യയിലെ ക്രിക്കറ്റ് ആരാധകർ.

കമിൻസ് വിമാനത്താവളത്തിൽ നിന്ന് പുറത്തിറങ്ങുന്നത്തിന്റെ ദൃശ്യങ്ങൾ വയറലായിരുന്നു. ഏതാനും മാധ്യമപ്രവർത്തകർ മാത്രമാണ് ഓസ്ട്രേലിയൻ ക്യാപ്റ്റന്റെ അടുത്തെത്തിയത്.

വിമാനത്താവളത്തിലെ യാത്രക്കാര്‍ കമിൻസിനെ ശ്രദ്ധിക്കാതെ നടന്നുപോകുന്നതും വി‍ഡിയോയിലുണ്ട്. ലോകകപ്പ് വിജയത്തിനു ശേഷം ഓസീസ് താരങ്ങളെല്ലാം നാട്ടിലേക്കു മടങ്ങിപ്പോയിട്ടില്ല.

അഞ്ച് മത്സരങ്ങൾ അടങ്ങിയ ടി 20 പരമ്പര കളിക്കാനുള്ളതിനാൽ ചില താരങ്ങൾ ഇന്ത്യയിൽ തന്നെ തുടരുകയാണ്. വ്യാഴാഴ്ച ആദ്യ ട്വന്റി20 മത്സരം ആരംഭിക്കും. ലോകകപ്പ് ഫൈനലിൽ ഇന്ത്യയെ ആറു വിക്കറ്റിനു കീഴടക്കിയാണ് ഓസ്ട്രേലിയ ഏകദിന ലോകകപ്പിലെ ആറാം കിരീടം സ്വന്തമാക്കിയത്.