അടിയറവ് പറഞ്ഞ് അല്‍ നസര്‍; എഎഫ്‌സി ചാമ്പ്യന്‍സ് ലീഗില്‍ അല്‍ നസറിന് പരാജയം

റിയാദ്: കിങ് സൗദ് സ്റ്റേഡിയത്തില്‍ നടന്ന ചാമ്പ്യന്‍സ് ലീഗ് ക്വാര്‍ട്ടറില്‍ മത്സരത്തില്‍ നിന്ന് ക്രിസ്റ്റിയാനോ റൊണാള്‍ഡോ പുറത്ത്. യുഎഇയുടെ അല്‍ ഐനിനോട് പരാജയം വഴങ്ങിയതോടെയാണ് അല്‍ നസര്‍ പുറത്തായത്. പെനാള്‍ട്ടി ഷൂട്ട് ഔട്ടിലാണ് അല്‍ നസര്‍ പരാജയം ഏറ്റുവാങ്ങിയത്. അല്‍ നസറിന് വേണ്ടി റൊണാള്‍ഡോ ഗോള്‍ നടേിയെങ്കിലും വിജയിക്കാനായില്ല.

ചൊവ്വാഴ്ച നടന്ന മത്സരത്തിന്റെ ആദ്യ പാദത്തില്‍ അല്‍ ഐനിന്റെ സൗഫിയാനെ റഹിമി നേടിയ ഒരു ഗോളിന് അല്‍ നസര്‍ പരാജയപ്പെട്ടിരുന്നു. രണ്ടാം പാദത്തില്‍ ആദ്യ പകുതിയില്‍ തന്നെ രണ്ട് ഗോളടിച്ച് അല്‍ നസര്‍ ലീഡെടുത്തു. ആദ്യ പകുതിയുടെ ഇഞ്ച്വറി ടൈമില്‍ അബ്ദുല്‍ റഹ്മാന്‍ ഗരീബിലൂടെ അല്‍ നസര്‍ ഒരു ഗോള്‍ മടക്കി.

രണ്ടാം പകുതിയില്‍ അല്‍ നസറിന്റെ തിരിച്ചുവരവാണ് കാണാന്‍ സാധിച്ചത്. 51-ാം മിനിറ്റില്‍ ഖാലിദ് ഈസയുടെ സെല്‍ഫ് ഗോളില്‍ അല്‍ നസര്‍ ഒപ്പംപിടിച്ചു. 61-ാം മിനിറ്റില്‍ അല്‍ നസറിന് മുന്നിലെത്താനുള്ള അവസരം ലഭിച്ചു. പക്ഷേ ഗോള്‍ കീപ്പര്‍ മാത്രം മുന്നില്‍ നില്‍ക്കെ ക്രിസ്റ്റ്യാനോ റൊണാള്‍ഡോയുടെ ഷോട്ട് പുറത്തേക്ക് പോയി.

72-ാം മിനിറ്റില്‍ ബ്രസീലിയന്‍ ലെഫ്റ്റ് ബാക്ക് അലക്‌സ് ടെല്ലസ് ഫ്രീകിക്കിലൂടെ ഗോള്‍ നേടി അല്‍ നസറിനെ മുന്നിലെത്തിച്ചു. കളി അധിക സമയത്തേക്ക് നീണ്ടു. പകരക്കാരനായി ഇറങ്ങിയ അയമാന്‍ യഹ്യ പുറത്തായത് അല്‍ നസറിന് തിരിച്ചടിയായി. 103-ാം മിനിറ്റില്‍ സൂപ്പര്‍ സബ് അല്‍ ഷംസി അല്‍ ഐനിന് വേണ്ടി ഗോള്‍ നേടി. 116-ാം മിനിറ്റില്‍ അല്‍ ഐന്‍ ഡിഫന്‍ഡര്‍ റൊണാള്‍ഡോയെ ബോക്‌സിനുള്ളില്‍ വീഴ്ത്തിയതിന് അല്‍ നസറിന് പെനാല്‍റ്റി ലഭിച്ചു.

റൊണാള്‍ഡോ തന്നെ കിക്കെടുക്കുകയും അത് ഗോളാക്കി മാറ്റുകയും ചെയ്തു. സ്‌കോര്‍ 4-3 ആയി മാറുകയും അഗ്രിഗേഷനില്‍ മത്സരം സമനിലയിലാവുകയും ചെയ്തു. ഇതോടെ മത്സരം പെനാല്‍റ്റി ഷൂട്ടൗട്ടിലേക്ക് നീണ്ടു. ഷൂട്ട് ഔട്ടില്‍ അല്‍ ഐന്‍ മൂന്ന് കിക്കും ഗോളാക്കി. ഇതോടെ അല്‍ നസര്‍ പരാജയം വഴങ്ങി. ഇതോടെ അല്‍ ഐന്‍ എഎഫ്‌സി ചാമ്പ്യന്‍സ് ലീഗിന്റെ സെമിഫൈനലിലേക്ക് യോഗ്യത നേടി.