മധുരപ്രതികാരം! ഓസ്‌ട്രേലിയക്ക് മികച്ച സ്‌കോര്‍, മാര്‍ഷ്, സ്മിത്ത്, ലബുഷെയ്ന്‍ അര്‍ദ്ധ സെഞ്ച്വറി

രാജ്‌കോട്ട്: മൂന്നാം ഏകദിനത്തില്‍ ഇന്ത്യയ്‌ക്കെതിരെ മികച്ച വിജയ ലക്ഷ്യമുയര്‍ത്തി ഓസ്‌ട്രേലിയ. ടോസ് നേടി ബാറ്റിങ്ങിന് ഇറങ്ങിയ ഓസീസ് 50 ഓവറില്‍ ഏഴു വിക്കറ്റ് നഷ്ടത്തില്‍ 352 റണ്‍സെടുത്തു. 84 പന്തില്‍ 96 റണ്‍സെടുത്ത മിച്ചല്‍ മാര്‍ഷാണ് ടോപ് സ്‌കോറര്‍. ഇന്ത്യയ്ക്ക് 353 റണ്‍സ് വിജയ ലക്ഷ്യം.

സ്റ്റീവ് സ്മിത്ത് (61 പന്തില്‍ 74), ഡേവിഡ് വാര്‍ണര്‍ (34 പന്തില്‍ 56), മാര്‍നസ് ലബുഷെയ്ന്‍ (58 പന്തില്‍ 72) എന്നിവരും അര്‍ധ സെഞ്ചറി നേടി. ബാറ്റിങ്ങിനിറങ്ങിയ ഓസീസിനായി 78 റണ്‍സിന്റെ ഒന്നാം വിക്കറ്റ് കൂട്ടുകെട്ടാണ് വാര്‍ണറും മാര്‍ഷും ചേര്‍ന്നു അടിച്ചെടുത്തത്.

അര്‍ധ സെഞ്ചറിക്കു പിന്നാലെ വാര്‍ണറെ വിക്കറ്റ് കീപ്പര്‍ കെ.എല്‍. രാഹുലിന്റെ കയ്യില്‍ പ്രസിദ്ധ് കൃഷ്ണ എത്തിച്ചു. മിച്ചല്‍ മാര്‍ഷ് നിലയുറപ്പിച്ചതോടെ ഓസീസ് സ്‌കോര്‍ 200 ഉം കടന്നു മുന്നേറി. സ്പിന്നര്‍ കുല്‍ദീപ് യാദവിന്റെ പന്തില്‍ താരം പുറത്തായി. പ്രസിദ്ധ് കൃഷ്ണയുടെ ക്യാച്ചിലാണ് മാര്‍ഷിന്റെ മടക്കം.

പിന്നാലെയെത്തിയ സ്റ്റീവ് സ്മിത്തും അര്‍ധ സെഞ്ചറി തികച്ചു. സ്‌കോര്‍ 242 ല്‍ നില്‍ക്കെ മുഹമ്മദ് സിറാജിന്റെ പന്തില്‍ എല്‍ബിഡബ്ല്യു ആയി സ്മിത്ത് മടങ്ങി. ലബുഷെയ്ന്‍ ഒരു ഭാഗത്തു നിലയുറപ്പിച്ചപ്പോഴും അലക്‌സ് ക്യാരി (19 പന്തില്‍ 11), ഗ്ലെന്‍ മാക്സ്‌വെല്‍ (ഏഴു പന്തില്‍ അഞ്ച്), കാമറൂണ്‍ ഗ്രീന്‍ (13 പന്തില്‍ ഒന്‍പത്) എന്നിവര്‍ നിരാശപ്പെടുത്തി.

49-ാം ഓവറിലാണ് ലബുഷെയ്‌ന്റെ വിക്കറ്റു വീണത്. ജസ്പ്രീത് ബുമ്രയുടെ പന്തില്‍ ശ്രേയസ് അയ്യര്‍ ക്യാച്ചെടുത്ത് താരത്തെ മടക്കി. വാലറ്റത്ത് ക്യാപ്റ്റന്‍ പാറ്റ് കമ്മിന്‍സ് (22 പന്തില്‍ 19), മിച്ചല്‍ സ്റ്റാര്‍ക്ക് (രണ്ട് പന്തില്‍ ഒന്ന്) എന്നിവര്‍ പുറത്താകാതെനിന്നു.

ആദ്യ രണ്ടു മത്സരങ്ങള്‍ ജയിച്ച ഇന്ത്യ നേരത്തേ പരമ്പര സ്വന്തമാക്കിയിരുന്നു.