അക്‌സര്‍ പട്ടേലിന്റെ വെടിക്കെട്ട് ബാറ്റിംഗ് പാഴായി; ഇന്ത്യക്ക് 16 റണ്‍സ് തോല്‍വി

പൂനെ: രണ്ടാം ട്വിന്റി20യില്‍ ലങ്കക്കെതിരെ ഇന്ത്യക്ക് 16 റണ്‍സ് തോല്‍വി. സൂര്യകുമാര്‍ യാദവും അക്‌സര്‍ പട്ടേലും അര്‍ദ്ധ സെഞ്ചുറികളുമായി പൊരുതി നോക്കിയെങ്കിലും ഇന്ത്യന്‍ ഇന്നിംഗ്‌സ് 20 ഓവറില്‍ എട്ട് വിക്കറ്റിന് 190 റണ്‍സില്‍ അവസാനിച്ചു.

അക്സര്‍ പട്ടേല്‍, സൂര്യകുമാര്‍ യാദവ്, ശിവം മാവി വെടിക്കെട്ട് ബാറ്റിംഗ് ഇന്ത്യയെ വിജയത്തിലെത്തിച്ചില്ല. ഇതോടെ പരമ്പരയില്‍ ഒരു മത്സരം അവശേഷിക്കേ ലങ്ക 1-1ന് ഒപ്പമെത്തി. അക്സര്‍ 31 പന്തില്‍ 65 ഉം സൂര്യ 36 പന്തില്‍ 51 ഉം മാവി 15 പന്തില്‍ 26 ഉം റണ്‍സെടുത്ത് പുറത്തായി. ഒരു റണ്ണുമായി ഉമ്രാന്‍ മാലിക് പുറത്താവാതെ നിന്നു. ബാറ്റും പന്തുമായി തിളങ്ങിയ നായകന്‍ ദാസുന്‍ ശനകയാണ് ലങ്കയുടെ വിജയശില്‍പി.

കൂറ്റന്‍ വിജയലക്ഷ്യം പിന്തുടര്‍ന്ന ഇന്ത്യക്ക് തുടക്കം തകര്‍ച്ചയോടെയായിരുന്നു. 4.4 ഓവറുകള്‍ക്കിടെ 34 റണ്‍സ് നേടിയെങ്കിലും നാല് വിക്കറ്റ് നഷ്ടമാക്കി. ഇഷാന്‍ കിഷന്‍ 2, ശുഭ്മാന്‍ ഗില്‍ 5 എന്നിവരെ കാസുന്‍ രജിത പുറത്താക്കി. അരങ്ങേറ്റക്കാരന്‍ രാഹുല്‍ ത്രിപാഠിയെ അഞ്ച് പന്തില്‍ 5 റണ്‍സെടുത്ത് നില്‍ക്കേ ദില്‍ഷന്‍ മധുശനക മടക്കി. ക്യാപ്റ്റന്‍ ഹാര്‍ദിക് പാണ്ഡ്യ12 ചാമിക കരുണരത്നെയ്ക്ക് കീഴടങ്ങുകയായിരുന്നു. ഹസരങ്കയുടെ പന്തില്‍ ദീപക് ഹൂഡ 9 പുറത്താകുമ്പോള്‍ ഇന്ത്യ 9.1 ഓവറില്‍ 57-5.

തുടര്‍ന്നിറങ്ങിയ സൂര്യകുമാര്‍ യാദവ്, അക്സര്‍ പട്ടേല്‍ സഖ്യത്തിലായി കണ്ണുകള്‍. 14-ാം ഓവറില്‍ ഹസരങ്കയെ അക്സര്‍ തുടര്‍ച്ചയായ മൂന്ന് സിക്സുകള്‍ക്ക് പറത്തിയതോടെ ഇരുവരും 50 റണ്‍സ് പാര്‍ട്ണര്‍ഷിപ്പ് തികച്ചു. ഈ ഓവറില്‍ നാല് സിക്സുകളോടെ ഇരുവരും 26 റണ്‍സ് അടിച്ചുകൂട്ടി. തൊട്ടടുത്ത ഓവറില്‍ കരുണരത്നെയെ ബൗണ്ടറിലൈനിന് പുറത്തേക്ക് പറത്തി 20 പന്തില്‍ അക്സര്‍ 50 തികച്ചു. ഇതിനകം ആറ് സിക്സുകള്‍ അക്സര്‍ നേടിക്കഴിഞ്ഞിരുന്നു. അക്സറിന്റെ ആദ്യ രാജ്യാന്തര ഫിഫ്റ്റിയാണിത്. എന്നാല്‍ 33 പന്തില്‍ അമ്പത് തികച്ച സൂര്യകുമാര്‍(36 പന്തില്‍ 51) മധുശനകയുടെ പന്തില്‍ ഹസരങ്കയുടെ ക്യാച്ചില്‍ മടങ്ങിതോടെ ഇന്ത്യ വീണ്ടും സമ്മര്‍ദ്ദത്തിലായി.

അക്സറിനൊപ്പം ഏഴാം വിക്കറ്റില്‍ ഒത്തുചേര്‍ന്ന ശിവം മാവി പ്രതീക്ഷ നല്‍കി. മധുശനക എറിഞ്ഞ 18-ാം ഓവറില്‍ രണ്ട് സിക്സും ഒരു ഫോറും സഹിതം 17 റണ്‍സ് അടിച്ചു. രജിത എറിഞ്ഞ 19-ാം ഓവറില്‍ പിറന്നത് 12 റണ്‍സ്. അവസാന ഓവറില്‍ 21 റണ്‍സ് ഇന്ത്യക്ക് ജയിക്കാന്‍ വേണമെന്നിരിക്കേ പന്തെറിയാനുള്ള ഉത്തരവാദിത്തം ലങ്കന്‍ നായകന്‍ ദാസുന്‍ ശനക ഏറ്റെടുത്തു. മത്സരത്തില്‍ ശനകയുടെ ആദ്യ ഓവര്‍ കൂടിയായിരുന്നു ഇത്. മൂന്നാം പന്തില്‍ അക്സര്‍ (31പന്തില്‍ 65) കരുണരത്നെയുടെ ക്യാച്ചില്‍ പുറത്തായി. മാവിക്കും ഉമ്രാന്‍ മാലിക്കിനും പിന്നീട് വിജയലക്ഷ്യം എത്തിപ്പിടിക്കാനാവുന്നതായിരുന്നില്ല. മാവി(15പന്തില്‍ 26) ഇന്നിംഗ്സിലെ അവസാന പന്തില്‍ പുറത്തായി.

നേരത്തെ ഉമ്രാന്‍ മാലിക്കിന്റെ മൂന്ന് വിക്കറ്റ് പ്രകടനത്തിനും അക്സര്‍ പട്ടേലിന്റെ രണ്ട് വിക്കറ്റ് നേട്ടത്തിനും ലങ്കയെ പിടിച്ചുകെട്ടാനായിരുന്നില്ല. 207 റണ്‍സിന്റെ കൂറ്റന്‍ വിജയലക്ഷ്യമാണ് ലങ്ക ഉയര്‍ത്തിയത്. ടോസ് നഷ്ടപ്പെട്ട് ആദ്യം ബാറ്റ് ചെയ്ത ശ്രീലങ്ക നിശ്ചിത 20 ഓവറില്‍ ആറ് വിക്കറ്റിന് 206 റണ്‍സാണ് അടിച്ചുകൂട്ടിയത്. കുശാല്‍ മെന്‍ഡിസ് അര്‍ധ സെഞ്ചുറി നേടിയപ്പോള്‍ ചരിത് അസലങ്ക, ദാസുന്‍ ഷനക എന്നിവരുടെ വെടിക്കെട്ടും ലങ്കയെ കാത്തു. അവസാന ഓവറുകളില്‍ ദാസുന്‍ ഷനകയുടെ വെടിക്കെട്ട് ഫിഫ്റ്റിയും ലങ്കക്ക് തുണയായി. 22 പന്തില്‍ 56 റണ്‍സെടുത്ത ഷനക പുറത്താകാതെ നിന്നു. കുശാല്‍ മെന്‍ഡിസ് 31 പന്തില്‍ 52 റണ്‍സ് നേടി. ചാഹലിനായിരുന്നു മെന്‍ഡിസിന്റെ വിക്കറ്റ്.