ടീം റാങ്കിങ്ങില്‍ ഇന്ത്യയ്ക്ക് ഒന്നാം സ്ഥാനം നഷ്ടമായി; ഓസ്‌ട്രേലിയ ഒന്നാമത്

ദുബായ്: ഐസിസി ടെസ്റ്റ് ടീം റാങ്കിങ്ങില്‍ ഇന്ത്യയ്ക്ക് ഒന്നാം സ്ഥാനം നഷ്ടമായി.റാങ്കിങ്ങില്‍ ഇന്ത്യയെ രണ്ടാം സ്ഥാനത്തേക്ക് പിന്തള്ളി ഓസ്‌ട്രേലിയയാണ് ഒന്നാമതെത്തിയത്. ഇതോടെ 2023 സെപ്റ്റംബര്‍ മുതല്‍ ക്രിക്കറ്റിലെ 3 ഫോര്‍മാറ്റുകളിലും ഒരേ സമയം ഒന്നാം റാങ്ക് കയ്യടക്കി വച്ചിരുന്ന ഇന്ത്യയ്ക്ക് ആ അപൂര്‍വ നേട്ടവും നഷ്ടമായി.

ഏകദിനത്തിലും ട്വന്റി20യിലും ഇന്ത്യ ഒന്നാം റാങ്കില്‍ തുടരും. പാക്കിസ്ഥാനെതിരായ ടെസ്റ്റ് പരമ്പരയിലെ ആദ്യ 2 മത്സരങ്ങളും ജയിച്ച് പരമ്പര സ്വന്തമാക്കിയതോടെയാണ് (20) ഓസ്‌ട്രേലിയ റാങ്കില്‍ ഒന്നാമതെത്തിയത്. ദക്ഷിണാഫ്രിക്കയ്‌ക്കെതിരായ രണ്ടാം ടെസ്റ്റ് ജയിച്ചെങ്കിലും പരമ്പര സമനിലയിലായത് ഇന്ത്യയ്ക്കു തിരിച്ചടിയുമായി. ദക്ഷിണാഫ്രിക്കന്‍ പര്യടനത്തിലെ ആദ്യ ടെസ്റ്റില്‍ ഇന്ത്യ വന്‍ തോല്‍വി വഴങ്ങിയിരുന്നു.