കേന്ദ്ര ബജറ്റ് അവതരം വ്യാഴാഴ്ച; മൊറാർജി ദേശായിയുടെ റെക്കോർഡിനൊപ്പമെത്താൻ നിർമലാ സീതാരാമൻ!

ഡൽഹി: തുടർച്ചയായി ആറാം തവണയും കേന്ദ്ര ബജറ്റ് അവതരിപ്പിക്കുന്ന ധനമന്ത്രിയെന്ന നേട്ടം സ്വന്തമാക്കാനൊരുങ്ങി നിർമലാ സീതാരമൻ.2019 മുതലാണ് നിർമല സീതാരാമൻ തുടർച്ചയായി പാർലമെന്റിൽ ബജറ്റ് അവതരിപ്പിച്ച് തുടങ്ങിയത്. നിലവിൽ ഈ റെക്കോർഡ് മൊറാർജി ദേശായിയുടെ പേരിലാണ്.

1959-64 കാലഘട്ടത്തിൽ തുടർച്ചയായി അഞ്ച് വാർഷിക ബജറ്റുകളും ഒരു ഇടക്കാല ബജറ്റും അദ്ദേഹം അവതരിപ്പിച്ചിരുന്നു.മാത്രമല്ല പത്ത് ബജറ്റുകൽ അവതരിപ്പിച്ച് ഏറ്റവും അധികം ബജറ്റുകൾ അവതരിപ്പിച്ചതിന്റെ റെക്കോർഡും മൊറാർജി ദേശായിക്കാണ്.

നേരത്തെ ധനമന്ത്രിമാരായ മൻമോഹൻ സിംഗ്, അരുൺ ജെയ്റ്റ്‌ലി, പി.ചിദംബരം, യശ്വന്ത് സിൻഹ എന്നിവരും തുടർച്ചയായി അഞ്ച് തവണ ബജറ്റ് അവതരിപ്പിച്ചിട്ടുണ്ട്. പി. ചിദംബരം 2003-2005 മുതൽ 2008-2009 വരെയും യശ്വന്ത് സിൻഹ 1998-ലും, 1999-2000 മുതൽ 2002-03 വരെയും തുടർച്ചയായി ബജറ്റ് അവതരിപ്പിച്ചു.

യശ്വന്ത് സിൻഹയാണ് വൈകുന്നേരം അഞ്ചിനുള്ള ബജറ്റ് അവതരണ സമയം മാറ്റി രാവിലെ 11 മുതലാക്കിയത്. 1991 മുതൽ 1996 വരെയുള്ള കാലഘട്ടത്തിലാണ് മൻമോഹൻ സിംഗ് തുടർച്ചായായി അഞ്ച് ബജറ്റുകൾ അവതരിപ്പിച്ചത്.എന്നാൽ വ്യാഴാഴ്ച ബജറ്റ് അവതരിപ്പിക്കുന്നതോടെ ഇവരെയെല്ലാം പിന്നാലാക്കി നിർമല സീതാരാമൻ തുടർച്ചയായി ആറ് തവണ കേന്ദ്ര ബജറ്റ് അവതരിപ്പിക്കുന്ന ധനമന്ത്രി എന്ന റെക്കോർഡ് സ്വന്തമാക്കും.

അതെസമയം ഏറ്റവും ദൈർഘ്യമേറിയ ബജറ്റ് അവതരിപ്പിച്ച റെക്കോഡും നിർമല സീതാരാമനാണ്. 2020-ൽ രണ്ട് മണിക്കൂർ 42 മിനിട്ട് സമയമെടുത്തായിരുന്നു ബജറ്റ് അവതരണം.മാത്രമല്ല പേപ്പർ ഇല്ലാതെ, അച്ചടിച്ച കോപ്പി ഇല്ലാതെ ബജറ്റ് അവതരിപ്പിച്ച ആദ്യ കേന്ദ്ര ധനമന്ത്രിയും നിർമലാ സീതാരാമനാണ്. 2021-ലെ ബജറ്റിലായിരുന്നു ഇത്. അച്ചടിച്ച കോപ്പി ഇല്ലാത്തതുകൊണ്ട് തന്നെ പാർലമെൻറ് അംഗങ്ങൾക്കും പൊതുജനങ്ങൾക്കും ‘യൂണിയൻ ബജറ്റ് മൊബൈൽ ആപ്പിൽ’ ലഭ്യമായിരുന്നു.

പാർലമെൻ്റിൻ്റെ ബജറ്റ് സമ്മേളനത്തിന് ബുധനാഴ്ചയോടെ തുടക്കമായി. വ്യാഴാഴ്ചയാണ് ധനമന്ത്രി നിർമ്മല സീതാരാമൻ കേന്ദ്ര ബജറ്റ് അവതരിപ്പിക്കുക. രണ്ടാം മോദി സർക്കാരിൻ്റെ അവസാന കേന്ദ്ര ബജറ്റാണിത്. രാഷ്ട്രപതിയുടെ നയപ്രഖ്യാപന പ്രസംഗത്തോടെയാണ് ബജറ്റ് സമ്മേളനം ഇന്ന് തുടങ്ങുക.സാമ്പത്തിക സർവേ റിപ്പോർട്ട് പാർലമെൻ്റിൻ്റെ മേശപ്പുറത്ത് വെക്കില്ല. കൈയടി നേടാനുള്ള പ്രഖ്യാപനങ്ങൾ ഉണ്ടാകുമെന്നാണ് സൂചന.