ഡൗണിങ് സ്ട്രീറ്റ് 10ല്‍ ദീപങ്ങള്‍ തെളിയിച്ച് ഋഷി സുനകും ഭാര്യയും; ആഘോഷത്തില്‍ പങ്കെടുത്ത് പ്രമുഖര്‍, സമ്മാനങ്ങള്‍ കൈമാറി എസ് ജയശങ്കര്‍

ലണ്ടന്‍: ദീപാവലി ആഘോഷിച്ച് ബ്രിട്ടീഷ് പ്രധാനമന്ത്രി ഋഷി സുനകും കുടുംബവും. ബ്രിട്ടീഷ് പ്രധാനമന്ത്രിയുടെ ഔദ്യോഗിക ഓഫീസായ ഡൗണിങ് സ്ട്രീറ്റ് 10ല്‍ വെച്ചാണ് ഋഷി സുനകും ഭാര്യ അക്ഷത മൂര്‍ത്തിയും ദീപങ്ങള്‍ തെളിയിച്ച് ദീപാവലി ആഘോഷിച്ചത്.

പാര്‍ലമെന്റ് അംഗങ്ങള്‍, പ്രമുഖ വ്യവസായികള്‍, ബോളിവുഡ് താരങ്ങള്‍, വിവിധ ഇന്ത്യന്‍ സമൂഹങ്ങളിലെ പ്രതിനിധികള്‍ എന്നിവരും ആഘോഷത്തില്‍ പങ്കെടുത്തു.

ദീപാവലി ആഘോഷത്തിന്റെ ചിത്രങ്ങളും വീഡിയോയും ബ്രിട്ടീഷ് പ്രധാനമന്ത്രി സാമൂഹിക മാധ്യമത്തില്‍ പങ്കുവെച്ചു. കേന്ദ്രമന്ത്രി എസ് ജയശങ്കറും ഭാര്യയും ഋഷി സുനകിനെ കണ്ട് ആശംസകളും സമ്മാനങ്ങളും കൈമാറി.

ഗണപതിയുടെ വിഗ്രഹവും ക്രിക്കറ്റ് താരം വിരാട് കോലിയുടെ ഓട്ടോഗ്രാഫ് രേഖപ്പെടുത്തിയ ക്രിക്കറ്റ് ബാറ്റുമാണ് ഋഷി സുനകിന് സമ്മാനിച്ചത്. പ്രധാനമന്ത്രി നരേന്ദ്ര മോദിയുടെ ആശംസകളും എസ് ജയശങ്കര്‍ അറിയിച്ചു.