/kalakaumudi/media/agency_attachments/zz0aZgq8g5bK7UEc9Bb2.png)
/kalakaumudi/media/post_banners/2fe08a590f5e92555307b4cb2e91460b278f6f31ad44104ad4fdd43f7b0c10f9.jpg)
ഹൈദരാബാദ്: ഹോളിവുഡ് നടനും ഡബ്യൂഡബ്യൂഇ സൂപ്പര്‍താരവുമായ ജോണ്‍ സീനയുമായി കൂടികാഴ്ച നടത്തി തമിഴ് ചലച്ചിത്ര താരം കാര്‍ത്തി. ഇരുവരും ഒരുമിച്ചുള്ള ചിത്രം കാര്‍ത്തി ഇന്‍സ്റ്റഗ്രാമില്‍ പങ്കുവച്ചു. ഹൈദരാബാദിലെ ഡബ്യൂഡബ്യൂഇ സ്‌പെക്ടാക്കിളില്‍ വച്ചായിരുന്നു കൂടികാഴ്ച എന്നാണ് പോസ്റ്റ് നല്‍കുന്ന സൂചന.
ജോണ്‍ സീനയെ കാണാന്‍ സാധിച്ചതില്‍ അതിയായ സന്തോഷമുണ്ട്. എന്നോട് കാണിച്ച ഊഷ്മളതയ്ക്ക് നന്ദിയുണ്ട്. കുറച്ച് മിനുട്ടുകള്‍ക്കുള്ളില്‍ തന്നെ ആരുമായി അടുപ്പം സ്ഥാപിക്കുന്ന താങ്കളുടെ കഴിവ് അതിശയകരമാണ്. താങ്കളുടെ സിഗ്‌നേച്ചര്‍ മുദ്രവാക്യമായ ഹസില്‍ ലോയല്‍റ്റി റെസ്‌പെക്റ്റ് ഇതെല്ലാം അനുഭവപ്പെട്ടു - ഇന്‍സ്റ്റഗ്രാം പോസ്റ്റില്‍ കാര്‍ത്തി കുറിച്ചു.
ഡബ്യൂഡബ്യൂഇ ചരിത്രത്തില്‍ ഏറ്റവുമധികം ലോക ചാമ്പ്യന്‍ഷിപ്പ് വിജയിച്ച, ഈ എന്റര്‍ടെയ്‌മെന്റ് കായിക ലോകത്തെ എക്കാലത്തെയും മികച്ച പ്രൊഫഷണല്‍ ഗുസ്തിക്കാരില്‍ ഒരാളായിട്ടാണ് ജോണ്‍സീന അറിയപ്പെടുന്നത്. 16 തവണ ലോക ചാമ്പ്യനായ സീന, 13 തവണ ഡബ്യൂഡബ്യൂഇ ചാമ്പ്യനും മൂന്ന് തവണ ലോക ഹെവിവെയ്റ്റ് ചാമ്പ്യനും .
അഞ്ച് തവണ ഡബ്യൂഡബ്യൂഇ യുണൈറ്റഡ് സ്റ്റേറ്റ്സ് ചാമ്പ്യന്‍ , രണ്ട് തവണ ഡബ്യൂഡബ്യൂഇ ടാഗ് ടീം ചാമ്പ്യന്‍ , രണ്ട് തവണ വേള്‍ഡ് ടാഗ് ടീം ചാമ്പ്യന്‍ , രണ്ട് തവണ റോയല്‍ റംബിള്‍ ജേതാവ്, ഒരു തവണ മണി ഇന്‍ ബാങ്ക് ജേതാവ്. ഡബ്യൂഡബ്യൂഇ പ്രധാന പരിപാടിയായ റെസില്‍മാനിയ ഉള്‍പ്പെടെ നിരവധി പ്രധാന ഡബ്ല്യുഡബ്ല്യുഇ പേ-പെര്‍ വ്യൂ ഇവന്റുകളിലും ജോണ്‍ സീന വിജയിച്ചിട്ടുണ്ട്.
ഹോളിവുഡിലെ മുന്‍നിര താരങ്ങളിലൊരാളാണ് ജോണ്‍ സീന. 2006 ല്‍ ഇറങ്ങിയ ദി മറൈന്‍ എന്ന ചിത്രത്തില്‍ നായകനായി അരങ്ങേറിയ ജോണ്‍ സീന. ഫാസ്റ്റ് ആന്റ് ഫ്യൂരിയസിലെ ജേക്കബ് ടോറെറ്റോ എന്ന കഥാപാത്രമായി ശ്രദ്ധേയ പ്രകടനം നടത്തിയിരുന്നു. കൂടാതെ ദി സൂയിസൈഡ് സ്‌ക്വാഡിലും പീസ് മേക്കറെയും അതേ പേരിലുള്ള ടെലിവിഷന്‍ പരമ്പരയിലും ഡിസി കഥാപാത്രമായും ശ്രദ്ധേയ വേഷത്തില്‍ ജോണ്‍ സീന എത്തി. മേക്ക്-എ-വിഷ് ഫൗണ്ടേഷന്‍ എന്ന പേരിലുള്ള ചാരിറ്റി സംഘടനയിലൂടെ കാരുണ്യ പ്രവര്‍ത്തനങ്ങളിലും സജീവമാണ് ജോണ്‍ സീന.
പൊന്നിയിന്‍ സെല്‍വന്‍ 2 എന്ന മണിരത്‌നം ചിത്രമാണ് അവസാനമായി കാര്‍ത്തിയുടെതായി റിലീസായത്. രാജു മുരുഗന്‍ സംവിധാനം ചെയ്യുന്ന ജപ്പാന്‍ എന്ന ചിത്രമാണ് കാര്‍ത്തിയുടേതായി റിലീസ് ചെയ്യാന്‍ ഒരുങ്ങുന്ന പുതിയ ചിത്രം. അതിന് ശേഷം ലോകേഷ് കനകരാജ് സംവിധാനം ചെയ്യുന്ന കൈതി 2 അടക്കം അണിയറയില്‍ കാര്‍ത്തിക്കായി ചിത്രങ്ങള്‍ ഒരുങ്ങുന്നുണ്ട്.