മാളവികയുടെ വീട്ടില്‍ മോഷണം; ഒന്നര ലക്ഷത്തിന്റെ വാച്ച് കവര്‍ന്നു, സിസിടിവി ദൃശ്യങ്ങള്‍ പുറത്ത് വിട്ട് തേജസ്

നടി മാളവികയുടെ വീട്ടില്‍ കള്ളന്‍ കയറുന്നതിന്റെ ദൃശ്യങ്ങള്‍ മാളവികയുടെ ഭര്‍ത്താവും നടനുമായ തേജസ് സാമൂഹ്യ മാധ്യമത്തില്‍ പങ്കുവെച്ചു. കഴിഞ്ഞ ദിവസമാണ് മാളവികയുടെ പാലക്കാട് ഞാങ്ങാട്ടിരിയിലെ വീട്ടില്‍ മോഷണം നടന്നത്.

ഒന്നര ലക്ഷം രൂപ വില വരുന്ന വാച്ച് ഉള്‍പ്പെടെ വിലപിടിപ്പുള്ള സാധനങ്ങള്‍ മോഷണം പോയിരുന്നു. വീടിന്റെ മുന്‍ വാതില്‍ കുത്തിപ്പൊളിച്ചാണ് കള്ളന്‍ അകത്ത് കയറിയത് എന്ന് തേജസ് ജ്യോതി സിസിടിവി ദൃശ്യം പങ്കുവെച്ച് പറഞ്ഞു. വസ്ത്രങ്ങളും മറ്റും വാരി വലിച്ചിട്ടു.

കള്ളന്‍ വീട്ടിലെ അലമാരയും പൊളിച്ചിട്ടുണ്ട്. ഞങ്ങള്‍ സ്ഥലത്ത് ഉണ്ടിയിരുന്നെങ്കില്‍ ചിലപ്പോള്‍ വലിയ അപകടമായേനെയെന്നും തേജസ് ചൂണ്ടിക്കാട്ടുന്നു.

മാളവികയും കുടുംബവും വീട്ടിലില്ലാതിരുന്ന സമയത്താണ് ഞാങ്ങാട്ടിരി വി കെ കടവ് റോഡിലെ വീട്ടില്‍ മോഷണം നടന്നത്. രാവിലെ ജോലിക്കാരി എത്തി വീട് തുറന്നപ്പോഴാണ് മോഷണ വിവരം അറിയുന്നത്.

കിടപ്പുമുറിയിലെയും അടുക്കളയിലെയും സാധനങ്ങള്‍ വലിച്ചുവാരി ഇട്ടിരിക്കുകയാണ്. മാളവികയുടെ ഒന്നര ലക്ഷം രൂപ വിലവരുന്ന വാച്ചാണ് മോഷ്ടാവ് പ്രധാനമായും കവര്‍ന്നത്.

മോഷ്ടാവ് വീട് കുത്തിത്തുറക്കാന്‍ ഉപയോഗിച്ച ഇരുമ്പ് ദണ്ഡും, ഉളിയും വീടിന്റെ പരിസരത്ത് ഉപേക്ഷിച്ച നിലയില്‍ കണ്ടെത്തി. ഇതില്‍ ഇരുമ്പ് ദണ്ഡ് സമീപത്തെ ഹോളോ ബ്രിക്‌സ് കടയില്‍ നിന്നും മോഷ്ടിച്ചതാണെന്ന് വ്യക്തമായി.

റെയിന്‍ കോട്ട് ധരിച്ച് മുഖം തോര്‍ത്ത് ഉപയോഗിച്ച് മറച്ച മോഷ്ടാവിന്റെ ദൃശ്യങ്ങള്‍ തൊട്ടടുത്ത വീട്ടിലെ സിസിടിവി ക്യാമറയില്‍ പതിഞ്ഞിട്ടുമുണ്ട്. ഇത് കേന്ദ്രീകരിച്ചാണ് പൊലീസ് അന്വേഷിക്കുന്നത്.