വടി വീശി ടൊവിനോ തോമസ്, വീഡിയോ വൈറല്‍, കമന്റുമായി താരങ്ങള്‍

മലയാളത്തിലെ യുവനടന്മാരില്‍ ഏറ്റവും ശ്രദ്ധേയനാണ് ടൊവിനോ തോമസ്. മിന്നല്‍ മുരളി പോലുള്ള വമ്പന്‍ ഹിറ്റുകളില്‍ നായകനായ ടൊവിനോയുടെ ഇന്‍സ്റ്റഗ്രാം വീഡിയോ വൈറലാകുന്നു. കളരിപ്പയറ്റിന്റെ ഭാഗമായ വടി വീശലാണ് ടൊവിനോ പരിശീലിക്കുന്നത്. പരിശീലനം പൂര്‍ണ്ണതയിലേക്കുള്ള മാര്‍ഗ്ഗം മാത്രമല്ല, യാത്ര തന്നെയാണ് എന്ന കുറിപ്പോടെയാണ് ടൊവിനോ വീഡിയോ പങ്കുവച്ചിരിക്കുന്നത്. സൈജു കുറുപ്പ്, റോഷന്‍ മാത്യു, വിഷ്ണു ഉണ്ണികൃഷ്ണന്‍ തുടങ്ങിയ താരങ്ങളും വീഡിയോയ്ക്ക് കമന്റ് ചെയ്തിട്ടുണ്ട്.

പുതിയ ചിത്രം ഐഡന്റിറ്റി, റിലീസ് ചെയ്യാനുള്ള പാന്‍ ഇന്ത്യന്‍ ചിത്രം അജയന്റെ രണ്ടാം മോഷണം തുടങ്ങിയ ചിത്രങ്ങള്‍ വീഡിയോയില്‍ പരാമര്‍ശിച്ചിട്ടുണ്ട്. കളരി ഗുരുക്കള്‍ പി വി ശിവകുമാറിനെയും വീഡിയോയില്‍ ടാഗ് ചെയ്തിട്ടുണ്ട്. ഫാന്റസി ചിത്രമായ അജയന്റെ രണ്ടാം മോഷണത്തിനു വേണ്ടിയാവാം ടൊവിനോ കളരിപ്പയറ്റ് പരിശീലിച്ചത്.

മലയാളം, തമിഴ്, ഹിന്ദി, കന്നട, തെലുങ്ക് എന്നീ ഭാഷകളിലാണ് അജയന്റെ രണ്ടാം മോഷണം റിലീസ് ചെയ്യുന്നത്. പാന്‍ ഇന്ത്യന്‍ സിനിമയായി ഒരുങ്ങുന്ന അജയന്റെ രണ്ടാം മോഷണം സംവിധാനം ചെയ്യുന്നത് ജിതിന്‍ ലാലാണ്.

ടൊവിനോ ആദ്യമായി ട്രിപ്പിള്‍ റോളില്‍ എത്തുന്നു എന്ന പ്രത്യേകതയും ചിത്രത്തിനുണ്ട്. മണിയന്‍, അജയന്‍, കുഞ്ഞികേളു എന്നീ വ്യത്യസ്ത കഥാപാത്രങ്ങളെയാണ് ടൊവിനോ ഈ ചിത്രത്തില്‍ അവതരിപ്പിക്കുന്നത്. മൂന്നു കാലഘട്ടങ്ങളുടെ കഥ പറയുന്ന ചിത്രം വമ്പന്‍ ബജറ്റില്‍ ആണ് ഒരുങ്ങുന്നത്. പൂര്‍ണമായും 3ഡിയിലാണ് സിനിമ ചിത്രീകരിച്ചത്.

മാജിക് ഫ്രെയിംസ് ,യുജിഎം പ്രൊഡക്ഷന്‍സ്, എന്നീ ബാനറുകളില്‍ ലിസ്റ്റിന്‍ സ്റ്റീഫന്‍, ഡോ. സക്കറിയ തോമസ്, എന്നിവര്‍ ചേര്‍ന്നാണ് നിര്‍മിക്കുന്നത്.

തെന്നിന്ത്യന്‍ താരം കൃതി ഷെട്ടി, ഐശ്വര്യ രാജേഷ്, സുരഭി ലക്ഷ്മി എന്നിവരാണ് ചിത്രത്തിലെ നായികമാര്‍. ബേസില്‍ ജോസഫ്, ജഗദീഷ്, ഹരീഷ് ഉത്തമന്‍, ഹരീഷ് പേരടി, പ്രമോദ് ഷെട്ടി, രോഹിണി എന്നിവരും പ്രധാന വേഷങ്ങളില്‍ എത്തുന്നു. ദിബു നൈനാന്‍ തോമസാണ് സംഗീത സംവിധാനം നിര്‍വഹിക്കുന്നത്.