/kalakaumudi/media/agency_attachments/zz0aZgq8g5bK7UEc9Bb2.png)
/kalakaumudi/media/post_banners/3effbcae49e057353b4d2ddb154855f5270ae93d4fea59140c877270e3c908e8.jpg)
കൂടിച്ചേരാനും സന്തോഷം പങ്കുവയ്ക്കാനുമൊരിടം ഒരുക്കാന്‍ വീടൊരുക്കുമ്പോള്‍ ശ്രദ്ധിക്കുന്നത് ഇന്ന് ട്രെന്‍ഡിയായിട്ടുണ്ട്. വീടിന്റെ ഡിസൈനില്‍ ഒരു 'എന്റര്‍ടെയ്ന്‍മെന്റ് സോണ്‍' എന്ന നിലയിലാണ് പാര്‍ട്ടി സ്‌പേസ് അഥവാ ഗെറ്റ്ടുഗതര്‍ സ്‌പേസ് ഒരുക്കുന്നത്. റൂഫ്‌ടോപ്പാണ് പ്രധാനമായും പാര്‍ട്ടി സ്‌പേസായി മാറ്റിയെടുക്കുന്നത്. പലപ്പോഴും ഉപകാരമില്ലാതെ ഒഴിവാക്കിയിടുന്ന റൂഫ്‌ടോപ്പുകളെ ഫങ്ങ്ഷണല്‍ സ്‌പേസാക്കി മാറ്റിയാണ് പാര്‍ട്ടി സ്‌പേസുകള്‍ ഒരുക്കുന്നത്.
നാലോ അഞ്ചോ സെന്റില്‍ വീടൊരുക്കുമ്പോള്‍ കോര്‍ട്ട്‌യാര്‍ഡിന്റെ വിസ്തൃതി പലപ്പോഴും പരിമിതപ്പെടുത്തേണ്ടി വരും. ഈയൊരു സാഹചര്യത്തില്‍ സ്‌പേഷ്യസായ റൂഫ് ടോപ്പുകളാണ് ഗാതറിങ്ങ് സ്‌പേസ് എന്ന നിലയിലേക്ക് ഒരുക്കിയെടുക്കാന്‍ എളുപ്പം. സ്വകാര്യത കൂടി പരിഗണിക്കുമ്പോള്‍ പാര്‍ട്ടി സ്‌പേയ്‌സാക്കാന്‍ കൂടുതല്‍ അനുയോജ്യമായ ഇടം കൂടിയാണ് ഇവിടം.
സ്‌ട്രെസ് വര്‍ക്ക് ചെയ്ത് മേല്‍ക്കൂരയിട്ടോ ഓപ്പണാക്കി നിലനിര്‍ത്തിയോ റൂഫ്‌ടോപ്പില്‍ പാര്‍ട്ടി സ്‌പേസ് ഒരുക്കാം. ഗാതറിങ്ങ് സ്‌പേസിന്റെ ആംപിയന്‍സ് റൂഫ്‌ടോപ്പിന് സൃഷ്ടിച്ചെടുക്കുകയെന്നതാണ് ഈയൊരു ഇടമൊരുക്കുമ്പോള്‍ ഏറ്റവും ശ്രദ്ധിക്കേണ്ടത്. ശാന്തതയും സന്തോഷവും പകരേണ്ട ഇടമെന്ന നിലയില്‍ ഗാര്‍ഡനിംഗും ലാന്‍ഡ്‌സ്‌കേപ്പിങ്ങുമാണ് ഇവിടെ ഹൈലൈറ്റായി വരേണ്ടത്. റൂഫ്‌ടോപ്പിന്റെ തറയില്‍ പുല്‍ത്തകിടി ഒരുക്കി ലാന്‍ഡ്‌സ്‌കേപ്പിനെ ഹരിതാഭമാക്കാം. റൂഫ്‌ടോപ്പായതിനാല്‍ തന്നെ സ്വാഭാവിക പുല്‍ത്തകിടിയൊരുക്കി പരിരക്ഷിക്കുകയെന്നത് പലപ്പോഴും ശ്രമകരമാണ്. അതിനാല്‍ തന്നെ വിപണിയില്‍ ലഭ്യമായിരിക്കുന്ന ആര്‍ട്ടിഫിഷല്‍ ഗ്രാസ് റൂഫ്‌ടോപ്പില്‍ ഉപയോഗിക്കുന്നതാണ് ഇപ്പോള്‍ ട്രെന്‍ഡ്. മെയിന്റന്‍സ് കുറവാണെന്നതാണ് ആര്‍ട്ടിഫിഷല്‍ ഗ്രാസിനെ കൂടുതല്‍ സ്വീകാര്യമാക്കുന്നത്. ദീര്‍ഘകാലം ഈടുനില്‍ക്കുമെന്നതും ആര്‍ട്ടിഫിഷല്‍ ഗ്രാസിന്റെ അഡ്വാന്റേജാണ്.
അനുയോജ്യമായ വിധത്തില്‍ ഗാര്‍ഡന്‍ കൂടിയൊരുക്കി ലാന്‍ഡ്‌സ്‌കേപ്പിന്റെ മനോഹാരിത കൂട്ടുന്നത് പാര്‍ട്ടി സ്‌പെയ്‌സിന് സവിശേഷമായ ഫീല്‍ പകര്‍ന്നു നല്‍കും. പ്രധാനമായും വെര്‍ട്ടിക്കല്‍ ഗാര്‍ഡനാണ് ഇതിന് ഉപയോഗിക്കുന്നത്. കാഴ്ചയിലുള്ള ഭംഗിയും പരിപാലനം കുറവാണെന്നതുമാണ് വെര്‍ട്ടിക്കല്‍ ഗാര്‍ഡന്റെ പ്രധാന സവിശേഷത. റൂഫ് ടോപ്പിന്റെ തുറസ്‌സായ ഓപ്പണുകള്‍ അര്‍ദ്ധസുതാര്യമാക്കാനും വെര്‍ട്ടിക്കിള്‍ ഗാര്‍ഡനുകള്‍ പ്രയോജനപ്പെടും. ഇതിലൂടെ പാര്‍ട്ടി സ്‌പേസിന് സ്വകാര്യത കൂടി ഉറപ്പിക്കാന്‍ സാധിക്കും.
ഒരു മെഷ് ക്രിയേറ്റ് ചെയ്ത് അതില്‍ തൂക്കിയിടാന്‍ സാധിക്കുന്ന ചെറിയ ചെറിയ ചെടിച്ചട്ടികള്‍ ഘടിപ്പിച്ച് അനുയോജ്യമായ ചെടികള്‍ വച്ചുപിടിപ്പിക്കുകയാണ് വെര്‍ട്ടിക്കല്‍ ഗാര്‍ഡന്‍ ഒരുക്കാന്‍ ഏറ്റവും സൗകര്യപ്രദവും ചിലവുകുറഞ്ഞതുമായ മാര്‍ഗ്ഗം. വെര്‍ട്ടിക്കല്‍ ഗാര്‍ഡനുകളുടെ പരിപാലനം എളുപ്പമാക്കാന്‍ ഉതകുന്ന സംവിധാനങ്ങളുമുണ്ട്. വെള്ളം അധികം ചിതറിക്കാതെ നനയ്ക്കാന്‍ സാധിക്കുന്ന സ്‌പ്രേയേഴ്‌സ് വിപണിയില്‍ ലഭ്യമാണ്. 2000 മുതല്‍ 5000 ലിറ്റര്‍ വരെ വെള്ളം കൊള്ളുന്ന സ്‌പ്രേയേഴ്‌സിന് 400 മുതല്‍ 500 വരെ രൂപ മാത്രമാണ് ചിലവ് വരുന്നത്. തൊട്ടുതൊട്ടുവീടുള്ള ഇടങ്ങളില്‍ അയല്‍വീട്ടുകാര്‍ക്ക് ബുദ്ധിമുട്ടില്ലാത്ത രീതിയില്‍ വെര്‍ട്ടിക്കല്‍ ഗാര്‍ഡന്‍ നനക്കാന്‍ സ്‌പ്രേയേഴ്‌സ് ഏറെ സഹായകമാണ്. വെര്‍ട്ടിക്കല്‍ ഗാര്‍ഡന്‍ നിര്‍മ്മിക്കുമ്പോള്‍ തന്നെ തുള്ളിനന(ഡ്രിപ്പ് ഇറിഗേഷന്‍) സംവിധാനം കൂടി ചെയ്ത് വയ്ക്കാറുണ്ട്. ചിലവ് കുറച്ച് കൂടുമെങ്കിലും തുള്ളിനന വീട്ടുകാരെ സംബന്ധിച്ചും സൗകര്യപ്രദമാണ്.
സ്ഥിരമായി വീട്ടിലില്ലാത്ത പ്രവാസികളെപ്പോലുള്ളവര്‍ക്ക് വെര്‍ട്ടിക്കല്‍ ഗാര്‍ഡന്റെ പരിപാലനം എളുപ്പമല്ല. അത്തരക്കാര്‍ക്ക് ആര്‍ട്ടിഫിഷല്‍ വെര്‍ട്ടിക്കല്‍ ഗാര്‍ഡനുകള്‍ വിപണിയില്‍ സുലഭമാണ്. ഒറിജിനലിനെ വെല്ലുന്നവയാണ് കൃത്രിമ വെര്‍ട്ടിക്കല്‍ ഗാര്‍ഡനുകള്‍. വീട്ടില്‍ സ്ഥിരമായി ഉണ്ടായിരിക്കുന്നവരെ സംബന്ധിച്ച് സ്വാഭാവിക വെര്‍ട്ടിക്കല്‍ ഗാര്‍ഡനുകളാണ് അഭികാമ്യം. ഓക്‌സിജന്‍ നന്നായി പുറത്തുവിടുന്ന ചെടികള്‍ തിരഞ്ഞെടുത്താല്‍ പാര്‍ട്ടി സ്‌പെയ്‌സിനെ നല്ലൊരു ഓക്‌സിജന്‍ സോണ്‍കൂടിയാക്കി മാറ്റാന്‍ സാധിക്കും.
പാര്‍ട്ടി സ്‌പേസിനെ സംബന്ധിച്ച് ബാര്‍ബിക്യു ഏരിയ പ്രധാനമാണ്. പാര്‍ട്ടി സെപേസ് ഡിസൈന്‍ ചെയ്യുന്നതിന് മുമ്പായി തന്നെ ബാര്‍ബിക്യു ഏരിയ എവിടെ വേണമെന്ന് മുന്‍കൂട്ടി നിശ്ചയിക്കേണ്ടതുണ്ട്. ഗ്യാസിലും കോളിലും ഇലക്ട്രിസിറ്റിയിലും ഉപയോഗിക്കാവുന്ന ബാര്‍ബിക്യു വിപണിയില്‍ ലഭ്യമാണ്. അതോടൊപ്പം ഗാര്‍ഡന്‍ ഫീല്‍ സമ്മാനിക്കുന്ന ചെറിയ കുടകളെല്ലാം ഇവിടെ സെറ്റ് ചെയ്യുന്നത് കാഴ്ചാനുഭവത്തെ മനോഹരമാക്കും. ചെറിയൊരു വാഷ് ബെയ്‌സിനും കണ്ണാടിയുമെല്ലാം പാര്‍ട്ടി ഏരിയയില്‍ സെറ്റ് ചെയ്ത് കൊടുക്കുന്നത് പാര്‍ട്ടി ഏരിയയെ കൂടുതല്‍ ഫങ്ഷണലാക്കി മാറ്റും. ഗാര്‍ഡനുകളുടെ മനോഹാരിതയെ തിളക്കമുള്ളതാക്കാന്‍ അനുയോജ്യമായ ലൈറ്റിംഗ് ഒരുക്കുന്നത് പാര്‍ട്ടി ഏരിയയ്ക്ക് പുതുമയുള്ള ഫീല്‍ പകര്‍ന്നു നല്‍കാന്‍ സഹായകമാകും. ഇതിനായി ടവര്‍ലൈറ്റുകളെല്ലാം ഉപയോഗപ്പെടുത്താറുണ്ട്.
എക്‌സ്റ്റീരിയറിലെ പാര്‍ട്ടി സ്‌പേസ്
കുറച്ചു കൂടി വിശാലമായ കോര്‍ട്ട്‌യാര്‍ഡ് ഉള്ളവര്‍ എക്‌സ്റ്റീരിയറും പാര്‍ട്ടിസ്‌പേസാക്കി ഉപയോഗപ്പെടുത്തുന്നുണ്ട്. സ്വകാര്യത സംരക്ഷിച്ചായിരിക്കണം ഇത്തരത്തില്‍ എക്‌സീറ്റിരിയറില്‍ പാര്‍ട്ടി സ്‌പേസ് ഒരുക്കാന്‍. കൂടുതല്‍ വിസിബിളായ ഇടമെന്ന നിലയില്‍ ഇന്റീരിയറില്‍ ഒരുക്കുന്ന പാര്‍ട്ടി സ്‌പേസ് സ്വഭാവികമായിരിക്കുന്നതാണ് ഭംഗി. ബുദ്ധബാംബൂസെല്ലാം വച്ചുപിടിപ്പിച്ചാല്‍ ഈ ഇടത്തിന് സ്വഭാവിക കാഴ്ചാനുഭവം ഉണ്ടാകുന്നതിനൊപ്പം സ്വകാര്യത ഉറപ്പിക്കാനും സാധിക്കും. ബാര്‍ബിക്യൂ സെറ്റ് ചെയ്യാനുള്ള സൗകര്യപ്രദമായ ഇടവും മുന്‍കൂട്ടി നിശ്ചയിക്കേണ്ടതുണ്ട്. എക്‌സ്റ്റീരിയര്‍ ആയതിനാല്‍ തന്നെ തറയില്‍ സ്വഭാവിക ബാര്‍ബിക്യു ഒരുക്കാന്‍ സാധിക്കും.
ഊരിമാറ്റാന്‍ സാധിക്കുന്ന മേല്‍ക്കൂരകള്‍ വിപണിയില്‍ ലഭ്യമായതിനാല്‍ തന്നെ എക്‌സ്റ്റീരിയര്‍ പാര്‍ട്ടി ഏരിയയ്ക്ക് ചൂടില്‍ നിന്നും മഴയില്‍ നിന്നും സംരക്ഷണം ഒരുക്കാന്‍ കൂടുതല്‍ എളുപ്പം സാധിക്കും. മടക്കിയൊതുക്കിവക്കാന്‍ സഹായിക്കുന്ന ഫര്‍ണിച്ചറുകള്‍ ഉപയോഗിക്കുന്നതും കൂടുതല്‍ സൗകര്യപ്രദമാണ്. ആളുകള്‍ കൂടുതലായി ഇടപഴകുന്ന ഇടമെന്ന നിലയില്‍ തറയില്‍ ഉപയോഗിക്കുന്ന പുല്ലിന്റെ ഗുണമേന്മയും പ്രധാനമാണ്. ടര്‍ഫുകള്‍ നിര്‍മ്മിക്കാന്‍ ഉപയോഗിക്കുന്ന ബാംഗ്‌ളൂര്‍ ഗ്രാസ് പാര്‍ട്ടി ഏരിയയില്‍ വിരിക്കുന്നത് ഗുണപ്രദമാണ്. മെയിന്റനന്‍സ് എളുപ്പമാക്കുന്നതിനൊപ്പം ബാംഗ്‌ളൂര്‍ഗ്രാസ് ഈടോടെ ദീര്‍ഘകാലം നിലനില്‍ക്കുകയും ചെയ്യും.
ദിപിന്‍ മാനന്തവാടി
വിവരങ്ങള്‍ക്ക് കടപ്പാട്:
കെ.ജി.ഫ്രാന്‍സിസ്
ഗ്രീന്‍ടെക് ഇന്റീരിയേഴ്‌സ്
കൊച്ചി
9947038600