തിരൂര്: മലപ്പുരം തിരൂരില് പതിനൊന്നുമാസം പ്രായമുള്ള ആണ്കുഞ്ഞിനെ കൊലപ്പെടുത്തി ഓടയില് തള്ളിയ കേസില് നാലുപേരുടെ അറസ്റ്റ് ചെയ്തു. കുഞ്ഞിന്റെ അമ്മ തമിഴ്നാട് നെയ് വേലി സ്വദേശി ശ്രീപ്രിയ(22) കാമുകന് നെയ് വേലി സ്വദേശി ജയസൂര്യ(22) ഇയാളുടെ മാതാപിതാക്കളായ കുമാര്(46) ഉഷ(41) എന്നിവരെയാണ് തിരൂര് പോലീസ് ഇന്സ്പെക്ടര് എം.കെ.രമേശ് അറസ്റ്റ് ചെയ്തത്.
കാമുകനും ഇയാളുടെ പിതാവും ചേര്ന്നാണ് കുഞ്ഞിനെ കൊലപ്പെടുത്തിയതെന്നും നാലാംപ്രതി ഉഷ ഇതിന് കൂട്ടുനിന്നെന്നും കുഞ്ഞിന്റെ മൃതദേഹം ശ്രീപ്രിയയാണ് ബാഗിലാക്കി ഉപേക്ഷിച്ചതെന്നും പോലീസ് പറഞ്ഞു. രണ്ടുമാസം മുന്പാണ് ശ്രീപ്രിയയും കാമുകനും അയാളുടെ പിതാവും ചേര്ന്ന് യുവതിയുടെ ആദ്യവിവാഹത്തിലുള്ള കുഞ്ഞിനെ കൊലപ്പെടുത്തി മൃതദേഹം തൃശ്ശൂര് റെയില്വേസ്റ്റേഷനില് ഉപേക്ഷിച്ചത്.
ശ്രീപ്രിയയുമായി തൃശ്ശൂര് റെയില്വേസ്റ്റേഷനിലെത്തിയ തിരൂര് പോലീസ് വെള്ളിയാഴ്ച രാത്രി ഏഴേമുക്കാലോടെയാണ് മൃതദേഹം കണ്ടെത്തിയത്. കുഞ്ഞിന്റെ മൃതദേഹം തൃശ്ശൂര് മെഡിക്കല് കോളേജ് ആശുപത്രിയില് പോസ്റ്റ്മോര്ട്ടം ചെയ്തു. പ്രതികളെ ശനിയാഴ്ച കോടതിയില് ഹാജരാക്കും.