/kalakaumudi/media/agency_attachments/zz0aZgq8g5bK7UEc9Bb2.png)
വയനാട്: വയനാട് മുണ്ടക്കൈ,ചൂരൽമല,മുണ്ടക്കൈ പ്രദേശങ്ങളിലുണ്ടായ മണ്ണിടിച്ചിൽ ദുരന്തത്തിൽ മരണ സംഖ്യ 156 ആയി ഉയർന്നു.രാവിലെ രക്ഷാപ്രവർത്തനം ആരംഭിച്ചതിനു പിന്നാലെ നിരവധി മൃതദേഹങ്ങളാണ് പലഭാഗങ്ങളിൽ നിന്നായി ദൗത്യസംഘം കണ്ടെടുത്തത്.മുണ്ടക്കൈയിലെ തകർന്ന വീടുകളിൽ നിന്നാണ് മൃതദേഹങ്ങള്‍ പുറത്തെടുത്തത്.
ഈ പ്രദേശത്ത് നിലവിൽ നാലുവീടുകളിൽ 8 മൃതദേഹങ്ങളാണ് കണ്ടെത്തിയത്. കസേരയില്‍ ഇരുന്ന അവസ്ഥയിലും മൃതദേഹങ്ങൽ കണ്ടെടുത്തു.ഇത്തരത്തിൽ ഇനിയും മൃതദേഹങ്ങൽ കുടുങ്ങി കിടക്കുന്നുണ്ടാകാമെന്നാണ് നിഗമനം. എന്നാൽ തകര്‍ന്ന വീടിനുള്ളില്‍ നിന്ന് മൃതദേഹങ്ങള്‍ പുറത്തെടുക്കുന്നത് ദൗത്യസംഘത്തിന് ഏറെ ദുഷ്കരമാണ്.വടംകെട്ടി വലിച്ചാണ് വീടുകളുടെ മേൽക്കൂര മാറ്റുന്നത്. അതെസമയം മുണ്ടക്കൈയിൽ മാത്രം 400 അധികം വീടുകൾ പഞ്ചായത്തിന്റെ രജിസ്റ്ററിൽ ഉണ്ടെന്നാണ് പഞ്ചായത്ത് അധികൃതര്‍ പറയുന്നത്. ഇതിൽ 35-40 വീടുകൾ മാത്രമേ ഇനി ബാക്കിയുള്ളൂ.
ഇരുനൂറിലധികം പേരെ കാണാനില്ലെന്നാണ് ബന്ധുക്കളിൽ നിന്ന് ലഭിക്കുന്ന വിവരം. എന്നാൽ 98 പേരെ കാണാനില്ലെന്നാണ് സർക്കാരിന്റെ ഔദ്യോഗിക കണക്കിൽ പറയുന്നത്. 20 മണിക്കൂർ നീണ്ട രക്ഷാദൗത്യം ഇന്നലെ രാത്രിയോടെയാണ് അവസാനിച്ചത്. ദുരിതബാധിതർക്കായി 8 ക്യാംപുകൾ ആരംഭിച്ചിട്ടുണ്ട്. 1222 പേരാണ് നിലവിൽ ക്യാംപുകളിൽ കഴിയുന്നത്.