‘നിന്റെ അവസാന ചിത്രമായിരിക്കുമിത്’: സംവിധായകനെ ഭീഷണിപ്പെടുത്തിയെന്നു പരാതി

കാഞ്ഞങ്ങാട്: തനിക്കെതിരെ വധ ഭീഷണിയുണ്ടായെന്ന സംവിധായകന്റെ പരാതിയിൽ കേസെടുത്ത് പൊലീസ് . ‘രാമനും കദീജയും’ സിനിമയുടെ സംവിധായകൻ കെ.ദിനേശൻ പൂച്ചക്കാടിന്റെ പരാതിയിലാണ് ബേക്കൽ പൊലീസ് കേസെടുത്തത്. കഴിഞ്ഞ 14ന് രാവിലെ 7ന് കീക്കാനത്തെ ഇദ്ദേഹത്തിന്റെ വീട്ടിൽ അതിക്രമിച്ച് കയറി ഭീഷണി ഉളവാക്കുന്ന തരത്തിലുള്ള എഴുത്ത് കൊണ്ടു വയ്ക്കുകയായിരുന്നു.

സിനിമ റിലീസ് ചെയ്യാനുള്ള ഒരുക്കത്തിനിടെയാണ് ഭീഷണി സന്ദേശം ലഭിച്ചത്. ‘നിന്റെ അവസാന ചിത്രമായിരിക്കുമിത്. നിനക്ക് പതിനാറിന്റെ പണി കിട്ടും’ എന്നിങ്ങനെയാണ് കത്തിൽ ഉണ്ടായിരുന്നതെന്ന് ദിനേശൻ പറയുന്നു. രണ്ടു സമുദായത്തെ കുറിച്ചുള്ള കഥ ആയതു കൊണ്ടാണ് ഭീഷണി സന്ദേശം ലഭിക്കാൻ ഇടയായതെന്നും അദ്ദേഹം പറഞ്ഞു.