വീണ്ടും അമീബിക് മസ്തിഷ്‌കജ്വരം; 9 വയസ്സുകാരി ചികിത്സയിൽ

തിരുവനന്തപുരം: സംസ്ഥാനത്ത് വീണ്ടും അമീബിക് മസ്തിഷ്‌കജ്വരം സ്ഥിരീകരിച്ചു. തിരുവനന്തപുരത്ത്  സ്വദേശിയായ 9 വയസ്സുകാരിക്കാണ് രോ​ഗം സ്ഥിരീകരിച്ചത്.  തിരുവനന്തപുരം എസ്.എ.ടി. ആശുപത്രിയിൽ ചികിത്സയിലുള്ള വെങ്ങാനൂർ സ്വദേശിനിയായ പെൺകുട്ടിയുടെ നില ഗുരുതരമാണെന്നാണ് സൂചന. നാലുപേർ മെഡിക്കൽ കോളേജിലും ചികിത്സയിലുണ്ട്. ഇവരുടെ ആരോഗ്യനില മെച്ചപ്പെട്ടതായും ആശുപത്രി അധികൃതർ അറിയിച്ചു. ചികിത്സയിലുള്ള ഒൻപതുവയസ്സുകാരിക്ക് കിണർ വെള്ളവുമായി മാത്രമാണ് സമ്പർക്കമുണ്ടായിട്ടുള്ളത്. വീട്ടിലെ പാചകത്തിന് ഉൾപ്പെടെ ഈ വെള്ളമാണ് ഉപയോഗിക്കുന്നത്.

തീവ്രമായ തലവേദന, പനി, ഓക്കാനം, ഛർദി, കഴുത്ത് തിരിക്കാൻ ബുദ്ധിമുട്ട്, വെളിച്ചത്തിലേക്കു നോക്കാൻ ബുദ്ധിമുട്ട്, കുഞ്ഞുങ്ങളിൽ ഭക്ഷണം കഴിക്കാനുള്ള വിമുഖത, നിഷ്‌ക്രിയരായി കാണപ്പെടുക, അസാധാരണ പ്രതികരണങ്ങൾ എന്നിവയാണ് രോ​ഗത്തിന്റെ പ്രധാന ലക്ഷണങ്ങൾ. ഗുരുതരാവസ്ഥയിലായാൽ അപസ്മാരം, ബോധക്ഷയം, ഓർമ്മക്കുറവ് എന്നിവയുണ്ടാകും. രോഗലക്ഷണങ്ങൾ പ്രകടമായാൽ എത്രയുംവേഗം ചികിത്സ തേടണം. നട്ടെല്ലിൽനിന്ന് സ്രവം കുത്തിയെടുത്ത് പി.സി.ആർ. പരിശോധനയിലൂടെയാണ് രോഗം സ്ഥിരീകരിക്കുന്നത്.