ജര്‍മനിയില്‍ കാണാതായ മലയാളി യുവാവ് മരിച്ച നിലയില്‍

മാവേലിക്കര: ജര്‍മനിയില്‍ കാണാതായ യുവാവിനെ മരിച്ച നിലയില്‍ കണ്ടെത്തിയതായി നാട്ടില്‍ വിവരം ലഭിച്ചു. മാവേലിക്കര മറ്റം വടക്ക് പൊന്നോലയില്‍ ആദം ജോസഫ് കാവുംമുഖത്തിനെ (ബിജുമോന്‍ 30) ആണു മരിച്ച നിലയില്‍ കണ്ടെത്തിയത്. അപകടത്തില്‍ മരിച്ചെന്നും കുത്തേറ്റ് മരിച്ചെന്നും തുടങ്ങിയ വ്യത്യസ്ത വിവരങ്ങളാണ് നാട്ടില്‍ ലഭിച്ചിരിക്കുന്നത്.
പത്തനംതിട്ട ആറാട്ടുപുഴ കാവുംമുഖത്ത് പരേതനായ ജോസഫിന്റെയും ലില്ലിയുടെയും മകനാണ്. ആദമിന് ഒരു വയസ്സുള്ളപ്പോള്‍ തന്നെ പിതാവ് മരിച്ചിരുന്നു. പിന്നീട് മാവേലിക്കരയില്‍ മാതൃസഹോദരിക്കൊപ്പമാണ് വളര്‍ന്നത്. കഴിഞ്ഞ സെപ്റ്റംബര്‍ 30 മുതല്‍ ആദമിനെ കാണാതായിരുന്നു എന്നാണ് നാട്ടില്‍ ലഭിച്ച വിവരം.