/kalakaumudi/media/agency_attachments/zz0aZgq8g5bK7UEc9Bb2.png)
/kalakaumudi/media/media_files/JDhwXCNVFkpTcdX0akzc.jpg)
ഇന്ത്യന്‍ മഹാസമുദ്രത്തിലും ബംഗാള്‍ ഉള്‍ക്കടലിലും ചൈന നാവികസേനയുടെ സാന്നിധ്യം വര്‍ധിപ്പിച്ച് ചൈന. ഇന്ത്യക്കു ചുറ്റുമുള്ള കടലില്‍ ചൈനീസ് നാവികസേന സാന്നിധ്യം ശക്തമാക്കുകയാണ്. ബംഗാള്‍ ഉള്‍ക്കടലിലും ഇന്ത്യന്‍ മഹാസമുദ്രത്തിലും ചൈനീസ് ഗവേഷണ കപ്പലുകള്‍ സജീവമാണെന്ന് റിപ്പോര്‍ട്ടുകള്‍ പറയുന്നു. കൂടാതെ മൂന്ന് യുദ്ധക്കപ്പലുകളുടെ ഒരു മിനിഫ്‌ളീറ്റ് ഔദ്യോഗിക സന്ദര്‍ശനത്തിനായി കൊളംബോയില്‍ തമ്പടിച്ചിട്ടുണ്ട്.
ഓഗസ്റ്റിലുടനീളം മൂന്ന് ചൈനീസ് സര്‍വേ കപ്പലുകള്‍ ഉപഭൂഖണ്ഡത്തിന് ചുറ്റുമുള്ള കടലുകളില്‍ സൈനികമായോ ബഹിരാകാശമായോ ബന്ധപ്പെട്ട പരീക്ഷണങ്ങള്‍ നടത്തി. ചൈനീസ് സര്‍വേ ഷിപ്പായ സിയാങ് യോങ് ഹോങ് ജൂലൈ മുതല്‍ ഓഗസ്റ്റ് ആദ്യം വരെ ബംഗാള്‍ ഉള്‍ക്കടലിലും ഇന്ത്യന്‍ മഹാസമുദ്രത്തിലും നിരവധി ആഴ്ചകള്‍ ചെലവഴിച്ചു. ഇതേ കാലയളവില്‍ മറ്റ് രണ്ട് ചൈനീസ് സര്‍വേ കപ്പലുകളും ഇന്ത്യന്‍ മഹാസമുദ്ര മേഖലയില്‍ സഞ്ചരിച്ചിരുന്നു.
സാറ്റലൈറ്റ്, മിസൈല്‍ ട്രാക്കിംഗിനായി ഉപയോഗിക്കുന്ന യുവാന്‍ വാങ് 7 എന്ന കപ്പല്‍ ആയിരുന്നു അതിലൊന്ന്. മറ്റൊന്ന്, 2020ല്‍ കമ്മീഷന്‍ ചെയ്ത ചൈനയിലെ എക്കാലത്തെയും വലിയ സമുദ്രശാസ്ത്ര ഗവേഷണപരിശീലന കപ്പല്‍ എന്ന് വിശേഷിപ്പിക്കപ്പെട്ട സോങ് ഷാന്‍ ഡാ യുവും. ഡ്രോണുകള്‍ക്കും ഹെലികോപ്റ്ററുകള്‍ക്കുമുള്ള ലാന്‍ഡിംഗ് പ്ലാറ്റ്‌ഫോം സോങ് ഷാന്‍ ഡാ യുവെ അവതരിപ്പിക്കുന്നു. ഇതിനെ 'കടലിലെ ഒരു വലിയ മൊബൈല്‍ ലബോറട്ടറി' എന്നാണ് വിളിക്കുന്നത്.
ഫെബ്രുവരി, മാര്‍ച്ച് മാസങ്ങളില്‍ ഇന്ത്യയും മാലിദ്വീപും ചൈനയും തമ്മിലുള്ള ത്രിതല നയതന്ത്ര തര്‍ക്കത്തിന്റെ കേന്ദ്രമായിരുന്നു സിയാങ് യാങ് ഹോങ്. കപ്പലുകള്‍ ചാരപ്രവര്‍ത്തനം നടത്തുമെന്ന് ഇന്ത്യയും യു.എസും നല്‍കിയ ശക്തമായ മുന്നറിയിപ്പിനെ തുടര്‍ന്ന് തുറമുഖങ്ങളില്‍ ഡോക്ക് ചെയ്യുന്ന ചൈനീസ് ഗവേഷണ കപ്പലുകള്‍ക്ക് ഈ വര്‍ഷം തുടക്കത്തില്‍ ശ്രീലങ്ക നിരോധനം ഏര്‍പ്പെടുത്തുകയുണ്ടായി. എന്നാല്‍, ചൈനയുടെ കടുത്ത സമ്മര്‍ദത്തെ തുടര്‍ന്ന് ശ്രീലങ്ക അടുത്ത വര്‍ഷം മുതല്‍ നിരോധനം നീക്കുമെന്നാണ് റിപ്പോര്‍ട്ട്. സാമ്പത്തിക പ്രതിസന്ധി നേരിടുന്ന ശ്രീലങ്ക ഇന്ത്യയെയും ചൈനയെയും തങ്ങളുടെ കടബാധ്യതകള്‍ പരിഹരിക്കുന്നതിനുള്ള ദൗത്യത്തില്‍ പ്രധാന പങ്കാളികളായി കണക്കാക്കുന്നു.